Кланиците, месарите и преработувачите на месо во Велика Британија залудно се обидуваат да го решат проблемот со недостаток на работна сила предизвикана од пандемијата на Ковид -19 и Брегзит, а потрагата ги доведе до затворениците, пишуваат британските медиуми.
Лидерите на месната индустрија во понеделникот разговараа со владата за можноста за поврзување на компаниите со затворите за пополнување на испразнетите работни места.
Здружението на независни добавувачи на месо за Би -Би -Си изјави дека во моментов имаат околу 14.000 слободни работни места, што одговара на околу 15 проценти од работната сила во секторот.
„Ковид“, „Брегзит“ и перцепцијата за работата во месната индустрија може да предизвикаат „криза за вработување“, предупредуваат тие.
Затоа, бизнисите ќе се обидат да се поврзат со отворените затвори, чии затвореници се вклучени во програмата за привремено пуштање на слобода, за да стекнат работно искуство и да го олеснат враќањето во општеството, објави асоцијацијата.
ПРОЧИТАЈТЕ ПОВЕЌЕ: Како да се интегрирате на пазарот на трудот по издржување затворска казна?
Tony Goodger од здружението објавува дека ќе контактира со членовите на кои им се потребни работници и ќе соработуваат со Министерството за правда за да ги поврзат со затворските служби за да ангажираат сегашни и поранешни затвореници.
Некои членови на здружението веќе вработиле затвореници, истакна Goodger, додавајќи дека тие се „пристојни, вредни и подготвени да учат“, а многумина во затворите, исто така, се стекнале со вештини за безбедност на храна, што ќе им помогне да се вработат во месната индустрија.
Производителот на мисиркино месо Bernard Matthews веќе воспостави врски со затворот HMP Norwich и редовно го посетува како дел од циклусот за вработување за да ги процени кандидатите и да им понуди договори на затворениците по нивното ослободување.
Прехранбената индустрија, исто така, се обиде да најде работници меѓу поранешните војници, но одговорот беше слаб, наведува Би-Би-Си.
