Според метеорологот Славчо Попоски, под влијание на јужно воздушно струење од утре па натаму ќе имаме значителен пораст на температурите на воздухот и во следните денови максималните температури ќе бидат натпросечни за овој период од годината и ќе се искачуваат во интервалот од 17 до 23 степени. Уште потопло ќе биде за време на викендот, кога на некои места температурите ќе се искачат дури до 25 степени.
Времето ќе биде променливо облачно и релативно суво со сончеви периоди. Ќе дува слаб до умерен, повремено на некои места засилен ветер од јужен и од југоисточен правец.
И во Скопскиот регион од утре температурите ќе бележат тенденција на пораст и максималните ќе се искачуваат во интервалот од 18 до 21 степен. Времето ќе биде променливо облачно со сончеви периоди. Ќе дува и слаб до умерен ветер од јужен и од југоисточен правец, и истиот повремено ќе засилува на интензитет.
