Речиси 30 000 деца во Хрватска сега се заразени или се во самоизолација, најголем дел од нив основци. И наставници се заразени, така што часовите се одржуваат онлајн одвреме-навреме
Децата на школска возраст во Хрватска наскоро ќе имаат обврска секој понеделник да се тестираат на коронавирус пред да одат на училиште. Како што дознава „Јутарњи лист“, во тек е изработка на план предложен од Министерството за наука и образование, според кој тестовите би биле дистрибуирани во сите училишта во Хрватска, по што би им биле поделени на родителите.
Учениците од прво одделение до завршните одделенија во гимназија би се тестирале дома еднаш неделно, а Министерството наскоро ќе објави подетални информации за тоа.
„Сметаме дека тоа е логичен правец. Има многу болни деца, но и самоизолација. Основниот план е децата да бидат тестирани од родителите во понеделник пред училиште. Засега се планира тест еднаш неделно, но доколку некој се покаже позитивен, епидемиолошката служба и училиштата одредуваат како ќе постапат“, вели потпретседателот на Влдата, Давор Божиновиќ.
Според ТВ Нова, тестирањето на децата би можело да почне за десет дена. Само заразените деца треба да останат дома. Сега е потребно се да се подготви логистички и да се опремат училиштата со милиони тестови.
Речиси 30 000 деца во Хрватска сега се заразени или се во самоизолација, најголем дел од нив основци. И наставници се заразени, така што часовите се одржуваат онлајн одвреме-навреме, наведуваат тамошните медиуми.
