Над 60 проценти од граѓаните опфатени со анкетата, која за „Детектор“ ја спроведе Институтот за политички истражувања – Скопје (ИПИС), изјавиле дека нивните месечни приходи не им ги покриват потребите што ги имаат за еден месец, додека 34,6 отсто рекле дека заработуваат доволно за да си ги покријат трошоците.
Споредено со истражувањето на ИПИС на истата тема, спроведено во 2020 година, процентот на граѓани што изјавиле дека не може да си ги покријат месечните трошоци се зголемил за 1,5 процентни поен, а за исто толку поени е зголемен и процентот на оние што рекле дека заработуваат доволно за покривање на потребите во текот на еден месец.
Анализирани според половата структура, жените сметаат дека имаат поголем проблем да заработат доволно за да си ги покријат месечните трошоци. Така, 65,3 отсто од анкетираните жени рекле дека не заработуваат доволно за да ги покријат месечните трошоци, а со таков проблем се соочуваат 56,3 проценти од машките испитаници. Од друга страна, 39,5 отсто од анкетираните мажи рекле дека месечните приходи им ги покриваат трошоците, а таков одговор дале 29,9 проценти од жените.
Во однос на прашањето за можноста за подигнување кредит во земјава, 47,8 проценти од анектираните изјавиле дека „не е тешко да се земе кредит“, а 31 отсто се со спротивно мислење. Дури 63,1 отсто од испитаниците изјавиле дека не користат кредити, а оние што користат, најчесто се одлучуваат за потрошувачки кредит. Ваков кредит користат 20,3 проценти од анкетираните, 8,2 отсто имаат станбен кредит, 2,6 проценти автомобилски, а 2,1 отсто подигнале брз кеш кредит.
Истражувањето покажува дека станбени кредити најчесто користат брачните двојки на возраст од 30 до 39 години, потрошувачки кредит граѓаните во возрасната категорија меѓу 40 и 49 години, а за брз кеш кредит најмногу се определуваат невработените и студентите. Речиси две третини од испитаниците или 65,3 отсто изјавиле дека државата треба дополнително да ги регулира условите и начините за земање брзи кеш кредити, додека 16,7 проценти сметаат дека нема потреба за тоа.
Анкетата е спроведена во периодот од 27 до 30 март оваа година, врз репрезентативен примерок од 1.117 испитаници.
Извор: vecer.press
