Сопственикот на модниот синџир „Zara“, „Inditex“ објави дека продажбата на колекцијата пролет-лето се зголемила за 16 отсто во изминатиот месец. Тоа е знак дека бизнисот на шпанскиот продавач на облека може да продолжи со своите силни перформанси и покрај повисоките трошоци за плати и губењето на бизнисот во Русија.
Најголемата светска таканаречена компанија за брза мода објави пораст на профитот од 54% за првиот фискален квартал, што е подобро од очекуваното. Продажбата на компанијата го задржа темпото во текот на зимските месеци по силната 2022-ра година, кога „Inditex“ надмина голем број други трговци на мало во услови на криза на трошоците за живот.
Нето добивката за кварталот што заврши во април достигна 1,2 милијарди евра, надминувајќи ги просечните очекувања на аналитичарите од 980 милиони евра, покажува истражувањето на „Refinitiv“.
Продажбата во продавниците и онлајн купувањата се зголеми за 13% на 7,6 милијарди евра во кварталот, одржувајќи слична стапка на раст од 13,5% пријавени во првите шест недели од финансиската година.
Резултатите покажуваат дека „Inditex“, чија пазарна капитализација за прв пат надмина 100 милијарди евра минатата недела, успеа да остане конкурентна додека ги зголеми цените, намалувајќи ги притисоците на трошоците. Компанијата ја зголеми просечната плата на вработените во продавниците на својот домашен пазар во Шпанија за 20%.
Inditex“ ги затвори своите повеќе од 500 продавници во Русија во март 2022-ра година по инвазијата на Москва на Украина во февруари и последователните санкции на Западот. Компанијата го продаде својот руски бизнис на „Daher Group“ со седиште во ОАЕ во октомври.
