Министерот за национална економија и финансии издал наредба за интензивирање на инспекциите – по службена должност или по претставки од граѓани, и порача дека никој нема да биде поштеден доколку не ги почитува законите и договорот за концесија
Граѓанско движење за слободни плажи зема замав во Грција, па власта најави засилени контроли за нелегално поставени лежалки.
Граѓанското движење започна на островот Парос, но брзо се прошири и на другите грчки острови со барања да се отстранат нелегалните лежалки кои ги поставиле баровите и рестораните на плажите и да има поголем простор за граѓаните.
По ова, министерот за национална економија и финансии на Грција, Костис Хаѕидакис, издал наредба за интензивирање на инспекциите – по службена должност или по претставки од граѓаните, со цел да се почитуваат договорите за концесија, а прекршителите да добијат казни.
Според надлежното Министерство, за време на инспекциите спроведени од 21 до 24 јули на островот Парос, по поднесените претставки од граѓаните за две плажи, биле констатирани значителни прекршоци и веднаш биле издадени наредби за отстранување на три бизниси од конкретните плажи.
Хаѕидакис истакна дека нивната цел е да се почитуваат законите и потпишаните договори, а оние кои ги прекршуваат, порача министерот, нека знаат дека никој нема да биде поштеден.
