Иако е далеку новата летна сезона, сепак не доаѓаат добри вести за македонските граѓаните имајќи предвид дека повеќето летуваат во Грција. А оттаму најавени поскапувања. Како што пишуваат тамошните медиуми на државата и требаат повеќе пари поради загубите од пожарите, а преку туризмот најбрзо може да се надополнат.
Грчката влада има намера да ги зголеми туристичките такси и очекуваниот приход од 600 милиони евра да ги насочи кон фондот за поправка на штетите предизвикани од климатските промени, изјави премиерот Киријакос Мицотакис.
Туристичката такса за најевтините ноќевања во апартмани ќе се зголеми од 0,50 на 1,50 евра за ноќ, објавија медиумите, а за ноќевања во хотели со пет ѕвезди од четири на десет евра од ноќевање.
Грција и оваа година беше опустошена од големи пожари, принудувајќи ги властите во јули да евакуираат илјадници туристи од островот Родос за само неколку часа.
Мицотакис рече и дека владата има намера да обезбеди 3,3 милијарди евра за санирање на штетите предизвикани од поплавите во Тесалија летово. Парите треба да се добијат од фондовите на Европската унија и од буџетот.
Обилните дождови на почетокот на септември предизвикаа поплави во Тесалија, во кои загинаа 17 лица. Угинаа десетици илјади животни, а уништени се куќи, патишта, мостови, земјоделско земјиште и посеви.
Извор: vecer.mk
