Кризата во градежниот сектор во Германија е на нов врв. Цените на речиси сите материјали се повисоки од пред енергетската криза. Компаниите од индустријата за изградба на станови гледаат мрачно на иднината, со поголем песимизам од кога било досега, според истражувањето на институтот Ifo, пренесува германската новинска агенција (dpa).
Во февруари индикаторот Ifo за компаниите специјализирани за изградба на станови падна на минус 61,9 поени, од минус 60,7 во претходниот месец.
„Домувањето никаде не гледа трошка надеж во моментот“, рече во четвртокот Клаус Вохрабе, раководител на истражување на институтот во Минхен. Многу компании, додаде, се жалат не само што нема нови вработувања, туку и дека се откажуваат стари договори.
Градежните работи поскапеа во последните две години поради скокот на цените на кредитите и трошоците за изградба. Поради ова, компаниите и приватните инвеститори ставија многу проекти во мирување или ги откажаа.
Индексот за деловна клима на Ifo се базира на месечно истражување на компаниите.
Цените на градежните материјали генерално продолжија да растат минатата година, без оглед на поевтинувањето на дрвото или челикот, покажуваат новите податоци на Централниот завод за статистика.
Цементот, варот и гипсот поскапеа за над 30 отсто, а свежиот бетон и плочките за речиси четвртина.
