Познатата Мона Лиза беше „жртва“ на кражба, копирање и вандализам (дури и напади со киселина, супи и колачи) во изминатите децении, но и покрај турбулентната историја, оваа икона сè уште стои недопрена.
Моментално е изложена во собата „Salle des Etats“ во Лувр во Париз, а е проценета на околу 834 милиони долари. Сепак, секој кој некогаш го посетил овој музеј знае дека не е лесно да се стигне до Мона Лиза: секогаш е преполно, а просторот е ограничен.
Мона Лиза е едно од најпосетуваните уметнички дела во светот, бидејќи милиони луѓе секоја година го посетуваат Лувр за да ја видат. Сепак, според извештајот од TimeOut, се чини дека сето тоа би можело да се промени наскоро бидејќи има планови за преместување на оваа слика на нова локација.
Раководството на музејот неодамна откри дека се повеќе туристи заминуваат разочарани по посетата на Мона Лиза поради пренатрупаноста, што не им дава доволно време навистина да се поврзат со ова ремек дело. Имено, Леонардо да Винчи сакал гледачот да воспостави личен однос „очи в очи“ со сликата, додека моментално ситуацијата се расплетува така што посетителите најмногу се соочуваат со селфи стапчиња и толпа други луѓе, далеку од познатата слика.
Но, наскоро треба да има промени. Мона Лиза сепак ќе остане во Лувр, но се планира да добие своја посебна просторија во подрумот, пренесува Putni Kofer.
„Долго ја разгледувавме идејата за преместување на Мона Лиза, но сега сите се согласуваме дека треба да одговориме на пренатрупаноста“, изјави за TimeOut Винсент Дељевин, главен кустос за уметност од шеснаесеттиот век во Лувр. Новата просторија би била дел од реновирањето на музејот, со целосно нов влез, иако се уште не е утврден точниот почеток на работите. Значи, ако планирате посета на Париз во иднина за да уживате во уметничките богатства, изгледа дека средбата со Мона Лиза ќе биде многу полесна.
Која е познатата Мона Лиза?
Ако некогаш сте се запрашале како се вика жената од познатата слика, знајте дека нејзиното вистинско име не е Мона Лиза, туку Лиза Џерардини. Нејзиниот сопруг, богатиот Франческо дел Џокондо, го нарачал ова ремек дело. Иако повеќето луѓе знаат дека сликата често се нарекува Мона Лиза, помалку е познато дека нејзиното оригинално име е „La Gioconda“, што на италијански значи „веселата жена“ или „онаа што се радува“.
Иако изгледа многу поголема на филмското платно, сликата всушност е висока само 77 см и широка 53 см. Сепак, и покрај својата скромна големина, Мона Лиза зрачи со своето присуство. Леонардо да Винчи ги искористил овие димензии за да создаде интимна врска помеѓу гледачот и портретот, оставајќи впечаток дека Мона Лиза директно комуницира со гледачот преку нејзината загадочна насмевка.
Овој портрет, на кој е прикажана млада жена со скрстени раце, продорен поглед и загадочна насмевка, беше инспирација за многу литературни, музички и сликарски дела. Помалку познат факт е дека Леонардо да Винчи работел на Мона Лиза 16 години, а нејзината импресивна историја е причина за нејзината строга заштита, односно законот донесен од француските власти кој предвидува сликата да не може да се продаде на никого бидејќи и припаѓа на јавноста. Денес нејзината вредност се проценува на околу 800 милиони долари.
