Стапалата може да отечат поради различни причини, а една од главните е дехидрацијата, која може да предизвика задржување на водата.
Како што расте температурата, така се зголемува и вообичаениот и непријатен проблем – отекувањето на нозете. Ако сте забележале дека вашите стапала се удвоиле додека сте биле надвор на жештината, не сте сами, пишува Dan Everson Podiatry.
Нозете можат да отекуваат од различни причини, а една од главните е дехидрацијата која може да предизвика задржување на водата во телото и со тоа да го влоши отокот на екстремитетите. Кога сме дехидрирани, нашето тело се труди да зачува што е можно повеќе течност, а тоа доведува до акумулација на вода во нашите ткива, пренесува net.hr.
Зошто стапалата отекуваат во лето?
Како и дехидрацијата, продолжените периоди на стоење или седење, особено при високи температури, може да го зголемат притисокот во вените на нозете и стапалата. Овој зголемен притисок може да ја намали циркулацијата на крвта и да доведе до задржување на течности и оток. Затоа, особено внимателни мора да бидат луѓето кои поминуваат часови на нозе или седат на високи температури.
Исто така, одредени медицински состојби може значително да придонесат за отечени стапала за време на топлото време. Болестите на срцето, бубрезите или црниот дроб се поврзани со отекување на нозете.
Отекот на нозете, медицински познатo како едем, во основа се јавува кога премногу течност се акумулира во ткивата на нозете или поради слаба циркулација или зголемен притисок во крвните садови. Топлината го влошува овој проблем бидејќи предизвикува телото да задржува повеќе вода и сол, што може да доведе до задржување на течности и оток.
Како да спречите отекување на нозете за време на летниот период?
Постојат неколку стратегии што можете да ги користите за да го спречите или намалите отокот на нозете.
Избегнувајте изложување на топло кога е можно
Ако вашите стапала отекуваат на топло време, обидете се да се изладите. Седнете под сенка или останете во климатизирани простории секогаш кога е можно. Користете мал вентилатор за ладење. Нанесете спреј за ладење на стапалата и нозете. Избегнувајте премногу топли бањи, тушеви и сауни. На крајот од туширањето, исплакнете ги стапалата со ладна вода за да ја подобрите циркулацијата.
Внимавајте што јадете
За да ја намалите можноста за отекување на стапалата, нозете и глуждовите, јадете храна со малку натриум како што се лесни чорби, супи и салати. Исто така, обидете се да се држите подалеку од ултра-обработена храна која обично е богата со сол.
Зголемете го внесот на вода
Можеби изгледа контраинтуитивно, но пиењето повеќе вода всушност може да го спречи отокот со тоа што го одржува телото хидрирано и му помага да го исфрли вишокот сол.
Удобни обувки
Носењето удобни обувки кои обезбедуваат добра поддршка и се направени од материјал што дише може во голема мера да спречи отечени стапала.
Редовно вежбање
Редовното вежбање како што се одење, пливање или возење велосипед може да ја подобри циркулацијата на крвта и да спречи таложење течности во нозете.
Подигање на стапалата
Секогаш кога е можно, кренете ги стапалата над нивото на срцето. Ова помага да се намали притисокот врз вените на нозете и стапалата и промовира дренажа на течности.
Земете магнезиум
Размислете за земање дневна доза на магнезиум, бидејќи 200 милиграми од овој додаток во исхраната може да помогнат во одржувањето на нивото на хидратација што ќе помогне да се намали отокот. Сепак, прво консултирајте се со вашиот лекар доколку имате какви било здравствени проблеми.
