Пролонгирање на почетокот на уписот на првачињата од почетокот на мај на почетокот на јуни, најави денеска министерот за образование Арбер Адеми. На денешната он лајн прес конфернеција со повеќе владини функционери тој објасни дека најверојатното поместување се должи на неможноста на родителите во овој период да ја обезбедат сета потребна документација за упис.
-Факт е дека е потребно да се соберат повеќе документи, бидејќи според новиот Закон за основно образование, за упис на првачиња се потребни потврди од здравствени установи за примени вакцини, од стоматолог и офталмолог, а овој период ограничено е движењето на населението, кажа Адеми.
Тој најави дека на една од наредните владини седници ќе биде донесена и одлуката за тоа дали ќе се полага државна матура или не.
-Една од опциите е и целосно укинување на државата матура. Другата е да се полага во јуни. Доколку се укине тоа ќе се регулира со Уредбата која ќе се однесува само на оваа генерација матуранти. Во таква ситуација ќе има потреба од квалификациони испити во тие студиски програми или единици каде ќе има голема конкуренција или матуранти кои ќе имаат ист број на бодови, но за некои од факултетите тоа е веќе позната ситуација. Такви квалификациони испити веќе се прават на Факултетот за драмски уметности, на Архитектонскиот факултет, рече министерот.
.jpg)
