Нова студија спроведена во Велика Британија укажа на генетска компонента на вегетаријанството. Студијата предводена од научници од Универзитетот Нортвестерн во САД откри 34 гени кои би можеле да се поврзат со преференциите за вегетаријанска храна. Ова откритие сугерира дека некои поединци може да се предиспонирани за вегетаријанска исхрана.
Луѓето избираат вегетаријанство поради огромен број причини, вклучувајќи религиозни верувања, етички грижи, грижи за животната средина и здравствени мотивации. На изборот на исхрана може да влијае и личниот вкус, метаболизмот и начинот на кој различните намирници влијаат на телото. Сепак, улогата на генетиката во обликувањето на овие избори остана во голема мера неистражена.
Во потрага по одговори, научниците го истражувале генетскиот состав на 5.324 строги вегетаријанци и го споредиле со составот на 329.455 невегетаријанци кои учествувале во студија која користела податоци од UK Biobank. Опсежната анализа на повеќе од 330.000 геноми доведе до идентификација на 34 гени потенцијално поврзани со вегетаријанството.
Меѓу овие гени, три покажаа значајна поврзаност со вегетаријанската исхрана, додека останатите 31 се сметаа за „потенцијално“ поврзани. Студијата, објавена во списанието PLOS ONE, истакнува дека некои од овие гени се вклучени во клучните функции како што се метаболизмот на липидите (масните) и функцијата на мозокот.
„Нашите податоци покажуваат дека придржувањето до строга вегетаријанска исхрана е под влијание на генетиката“, наведуваат авторите на студијата, цврсто утврдувајќи ја улогата на генетиката во изборот на исхраната.
Авторот на студијата д-р Набил Јасин, почесен професор по патологија на Универзитетот Нортвестерн, исто така постави интригантно прашање.
– Дали сите луѓе се способни за долгорочно преживување на строга вегетаријанска диета? Ова е прашање што не е сериозно проучено, смета тој.
Потенцијален траг?
Д-р. Јасин посочи на потенцијална трага, истакнувајќи ги разликите помеѓу растителните производи и месото, особено во однос на сложените липиди.
„Моја претпоставка е дека може да има липидна компонента или компоненти во месото што им се потребни на некои луѓе. И можеби луѓето чија генетика го фаворизира вегетаријанството се способни ендогено да ги синтетизираат овие компоненти. Меѓутоа, во овој момент, тоа е обична шпекулација и треба да се направи многу повеќе работа за да се разбере физиологијата на вегетаријанството“, признава Јасин.
Новото истражување, сепак, отвора ветувачки пат за понатамошно истражување на генетската основа на изборот на исхрана.
