Оваа серија најтопли месеци ќе остане запаметена како релативно студен период
Сонцето ќе пржи низ целата земја, а судејќи според прогнозите, најлошо би требало да биде денеска. Но, топлотниот бран ќе продолжи и викендов.
Топлотниот бран ја зафати јужна, централна и источна Европа и се предвидува дека температурите во некои земји ќе се искачат и над 40 степени. Највисоки температури се предвидуваат за Централна Европа и Балканскиот Полуостров.
Грција и Турција веќе се погодени од екстремно високи температури, дури и рекордни. Ноќе температурата е околу 30 степени, а преку ден надминува 40. Во Грција на 13 јуни 34 метеоролошки станици измериле максимална температура над 42°C, 136 над 40°C и 322 станици над 35°C.
Ова не е случај само во Европа. Индиската метеоролошка служба објави дека делови од главниот град Делхи ја забележале највисоката температура досега од речиси 50 степени Целзиусови. Саудиска Арабија предупреди на екстремно високи температури во Мека, каде што се потврдени над 1.000 смртни случаи поврзани со горештините за време на аџилакот, а температурите надминуваат 50 степени Целзиусови.
Се чини дека ова лето е најладното до крајот на животот
Тука доаѓаме до прашањето кое со години се повторува – дали ова лето е најстудено што ќе го имаме во животот? Се чини дека одговорот е да.
Студијата во списанието Nature сугерира дека климатските промени предизвикани од човекот ги потиснале летните максимуми многу подалеку од сè што е забележано во двата милениума. Минатогодишното лето на северната хемисфера беше најжешкото во последните 2000 години.
„Не треба да бидеме изненадени од тоа. За мене, тоа е само продолжение на она што го започнавме со ослободување на стакленички гасови кои предизвикуваат глобално затоплување“, вели водечкиот автор на студијата Јан Еспер, професор по климатологија на германскиот универзитет Јоханес Гутенберг.
Да потсетиме и дека светските лидери во 2015 година ветија дека ќе се обидат да го ограничат долгорочното зголемување на температурата на 1,5 степени. Тоа значи дека до 2100 година, просечната глобална температура на површината нема да се зголеми за повеќе од 1,5 степени Целзиусови во споредба со прединдустриското ниво.
„Светот сега одбележа една цела година последователни месечни рекорди на топлина, објави Коперникус. Тоа беше, исто така, 11-ти последователен месец во кој глобалната просечна температура беше најмалку 1,5 Целзиусови степени над просекот од прединдустрискиот период.
Карло Буонтемпо, директор на Службата за климатски промени Коперникус, рече дека низата е шокантна, но не и изненадувачка.
„Нема индикации дека таквиот тренд ќе се промени. Живееме во невидени времиња, а оваа серија најтопли месеци ќе остане запаметена како релативно студен период“, рече тој.
