Во сенка на проблемите со јавниот превоз во Скопје, каде автобусите на ЈСП се сè поретко видливи на градските улици, скопските таксисти изгледаат како единствените кои наоѓаат причина за задоволство.
Со намалениот број на автобуси, особено за време на летните жештини, таксистите се соочуваат со зголемена побарувачка за нивните услуги.
Еден искусен таксист од главниот град објаснува:
„Работата ни е драстично зголемена. Наутро, кога сите брзаат на работа, со сите сили се обидуваме да се справиме со големиот број повици. И попладне, кога температурите сѐ уште се високи, луѓето кои се уморни и сакаат да се вратат дома, се обидуваат да најдат такси, бидејќи автобусите се ретки или воопшто не се појавуваат“, објаснува таксистот.
Особено погодена е линијата со автобуски број 22, која го поврзува Транспортен центар со Волково.
Кога овие автобуси изостануваат, жителите на Волково се чувствуваат изолирани, без можност да стигнат до своите домови.
Таксистите, иако задоволни од зголемената заработка, исто така изразуваат загриженост за состојбата со јавниот превоз, која не само што влијае на нивниот бизнис, туку и на секојдневниот живот на граѓаните.
„Кога овие автобуси изостануваат, ние стануваме нивната единствена врска со градот. Тоа е добро за нашиот бизнис, но не е фер кон граѓаните кои се принудени да се потпрат само на нас и да плаќаат многу повеќе за превоз“, вели нашиот соговорник.
Оваа ситуација го отвора прашањето за одржливоста на градскиот транспорт и потребата од итни решенија кои ќе го обезбедат непреченото движење на граѓаните низ Скопје, особено во време кога температурите се високи и потребата за брз и ефикасен транспорт е најголема.
