Растот на депозитите е предизвикан од растот на штедењето на домаќинствата, додека зголемувањето на кредитирањето го прави зголемената побарувачка на кредити од домаќинствата и од компаниите.
Вкупните депозити во јули бележат раст од 7,3% на годишна основа, а за исто толку е забележан раст и кај кредитите. На месечно ниво во јули има раст за 0,5% кај депозитите и за 0,6% кај кредитите. Ова го покажуваат податоците на Народната банка.
Според овие податоци, растот на депозитите е предизвикан од растот на штедењето на домаќинствата, а зголемувањето на кредитирањето го прави зголемената побарувачка на кредити од домаќинствата и од компаниите. Кај корпоративниот сектор, депозитите на месечно ниво се зголемени за 0,2%, а кредитите за 0,5%, а кај домаќинствата депозитите бележат раст за 0,7%, а кредитите за 0,8%.
Кај потрошувачките и станбените кредити одобрени за физички лица е забележан раст од 0,9 и 0,8% на месечно и годишно ниво, а автомобилските кредити овој месец се повисоки за 2,5 и 23,6% на месечна и годишна основа, додека кредитите одобрени на кредитни картички се намалени за 0,2 и 8% на месечно и годишно ниво.
