Научници од Јужна Кореја спровеле истражување со податоци од околу 5,4 милиони лица – поранешни, сегашни пушачи и непушачи – и откриле дека може да бидат потребни и до 25 години за ризикот од срцеви заболувања да се врати на ниво како кај непушачите, по откажување од пушењето.
Резултатите од оваа студија се објавени во списанието „Јама нетворк опен“ (Jama Network Open).
Истражувањето, предводено од Џун Хван-чо, се заснова на податоци од Корејската национална служба за здравствено осигурување и опфатило период на следење од речиси 15 години. Според „Сити магазин“ (City Magazine), научниците заклучиле дека ризикот од кардиоваскуларни болести зависи од бројот на испушени цигари, независно од моментот кога лицето ќе се откаже од пушењето.
Кај поранешните пушачи е забележано значително намалување на ризикот од срцеви заболувања по откажувањето, но времето потребно за намалување на ризикот зависи од нивната изложеност на чад. Луѓето кои пушеле помалку имале подобрување во рок од пет до 10 години, додека за оние со подолга историја на пушење биле потребни до 25 години за ризикот да се изедначи со тој на непушачите.
Пушењето повеќе од осум години е означено како „точка од каде што нема враќање“, вели Џун, истакнувајќи дека раното откажување може значително да придонесе за јавното здравје. Поранешните тешки пушачи покажале помал ризик од срцеви заболувања отколку сегашните пушачи, но текот на подобрување бил значително подолг.
Извор: nezavisen.mk
