Ако себеси се гледате на една од следните позиции: Специјалист за маркетинг и односи со јавност, Стручен соработник во сектор Фармација или Раководител за клучни клиенти, пред вас е одлична понуда за вработување која не смеете да ја пропуштите! За да ги запознаеме потенцијалните кандидати што всушност претставува РИФАМ и како изгледа да се биде дел од компанијата, редакцијата на Vrabotuvanje.com разговараше со Д-р. Стојан Николиќ, Раководител на Сектор Фармација во РИФАМ.
На самиот почеток, сакавме да дознаеме малку повеќе за историјата на компанијата па го запрашавме Д-р. Стојан Николиќ што всушност претставува РИФАМ?
Д-р. Стојан Николиќ: РИФАМ е домашна, семејна компанија од Македонија основана во 1996 година, во 100% сопственост на фамилијата Ризванче, од каде всушност и потекнува името – Ри-фам. Со големопродажба на фармацевтски производи се занимава од 2004 година. Моментално брои 20 вработени, со реална потреба за уште најмалку 2. Најпознат деловен партнер е мултинационалната фармацевтска компанија Fresenius Kabi, но соработува со уште неколку високо рангирани гиганти во индустријата од Турција и Полска. Ги покрива сите сегменти од фармацевтскиот пазар, започнувајќи од козметички препарати за широка потрошувачка, преку високо-квалитетни додатоци на исхраната, па сѐ до етички лекови, кои се издаваат на лекарски рецепт или се применуваат само во здравствени установи. Препознатливи се по брендовите Метафен, Ногрипин, Биоксин и Нутраксин.
Во продолжение, Д-р. Стојан Николиќ ни раскажа и за почетокот на неговата приказна во РИФАМ и како изгледа кариерниот напредок во компанијата.
Д-р. Стојан Николиќ: Благодарејќи на една добра препорака, имав прилика непосредно да се запознаам со извршниот директор на компанијата во јуни 2017 година. Низ многу разговори отпосле меѓусебно си потврдивме дека првата средба била клучна од многу аспекти, но најмногу во поглед на взаемното разбирање, прифаќање и исклучително лесната, искрена и пред сѐ пријатна комуникација. Тврдам дека доколку нема ваква спонтана “хемија”, односно взаемно воодушевување и инспирирање уште на самиот почеток, тешко е да се очекува истата да се создаде подоцна. Сопствениците на РИФАМ се исклучително скромни и харизматични луѓе со заразен ентузијазам.
Позицијата која ми беше понудена од почеток беше Продукт Менаџер за портфолиото на главниот партнер, Fresenius Kabi. Добив конкретни цели и задачи, со прецизни (реалистични) рокови и комплетна поддршка за остварување на истите. Откако во поголем дел го исполнив ветеното, во рамките на предвидениот рок, во октомври 2018 година бев унапреден на сегашната позиција, Раководител на Сектор Фармација.
Во моментов, РИФАМ има активни огласи за вработување со атрактивни плати кои достигнуваат до 46.000 денари. Запрашавме кои други бенефиции, освен атрактивните плати, ги нуди компанијата на своите вработени?
Д-р. Стојан Николиќ: На прво место, потполно неограничената можност за развој и напредок, доколку забележиме дека вработениот покажува амбиција и вложува дополнителен труд. Секои 6 месеци спроведуваме евалуација на сите вработени според транспарентни клучни показатели за успех (KPI), со можност за зголемување на основната плата и искачување по скалилата на компанијата. Второ, приликата да се работи со луѓе кои имаат обемно, долгогодишно искуство во струката, темелно познавање на проблематиката и широка мрежа на контакти. Доколку сакате брзо “да научите занает”, РИФАМ е вистинското место. Трето, на кое особено многу работевме во 2018 година, ускладени меѓучовечки односи, конструктивна работна атмосфера без непотребен притисок и претежно неформална комуникација со одговорните, што резултира со брзо и ефикасно донесување и спроведување на одлуки.
Овие 3 бенефиции според мене се далеку позначајни од стандардните бонуси, службени автомобили, патувања во странство и слично, иако се разбира и тие се дел од она што им е ставено на располагање на нашите вработени. Луѓето кои сакаат чесно да работат, добро да заработат и притоа да уживаат во одредени привилегии се секогаш добредојдени кај нас.
За крај, го запрашавме Д-р. Стојан Николиќ што би им порачал на сите кандидати кои сакаат да станат дел од тимот на РИФАМ.
Д-р. Стојан Николиќ: Без разлика дали сте почетник или искусен професионалец, ќе добиете и шанса и поддршка да покажете што знаете и умеете. Ако забележиме дека покажувате амбиција за напредок, ќе ги тестираме границите на вашите можности. Секогаш ќе бидете љубезно и коректно третирани, но немојте да ја злоупотребите нашата доверба.
Сакаме: бројки. Бројките се апсолутниот и конечен критериум за оценување на резултатите од вашето работење.
Не сакаме: лаги и ароганција.
Честитаме родендени и разменуваме подароци. Праќаме маилови во 5 часот наутро и во 23 часот навечер. Користиме Биоксин шампони. Имаме по малку чудна смисла за хумор. Се расправаме и караме како да бидеме поуспешни. Се гушкаме. Дел од нас не пијат алкохол, ама имаме пристап до врвен бурек и баклава. Често обновуваме пасоши. Носиме лаптоп на плажа. Претежно сме насмеани. Пуштаме солзи радосници по успешно тромесечје. Работиме на себе. Не се доживуваме премногу сериозно.
Ако сте подготвени за предизвик да станете дел од амбициозен, компетитивен и атрактивен тим на една брзо растечка компанија, претставете ни се да видиме дали ќе има “хемија”.
