Ако отсекогаш сонувавте за настап во Премиер лигата, но поради повреди, недоволно труд или недостатокот на талент не сте успеале во тоа, не очајувајте – една компанија реши да ви даде втора шанса!
Free SuperTips објави оглас во кој се бара дегустатор на пити во Премиер лигата за сезоната 2019/2020. Работата од соништата за оние кои сакаат пита и фудбал вклучува одење на натпревари низ цела Англија и дегустирање на питите кои се продаваат на стадионите.
Откако ќе го погледнете целиот натпревар и ќе ја изедете питата, вашата работа ќе биде да ја известите компанијата за вашите впечатоци и оценка за тоа што сте го јаделе во однос на другите стадиони.
Работата вклучува дегустирање на пити додека гледате натпревар во живо и рангирање на клубовите врз основа на тоа кој прави најдобра пита во текот на целата сезона. Победникот на нашиот конкурс ќе добие билети за натпревари во Премиер лигата за сезоната 2019/2020 и ќе му биде платена по една пита од секој стадион, стои на веб страницата на Free SuperTips.
Од компанијата додаваат дека избраниот кандидат ќе треба да дава оценки за питите и да го споделува својот впечаток, а за тоа ќе се пишува на социјалните мрежи на Free SuperTips.
Па, ова изгледа како животна шанса за сите љубители на англискиот фудбал. Патувате низ Англија и ги гледате најатрактивните натпревари во најдобрата лига во светот додека уживате во превкусни пити.
