Дали е тоа уште еден прилог кон тезата дека е дојдено време четиридневната работна недела да влезе низ „големите врати“ во нашите работни средини?
Во денешниот свет, каде што деловните динамики постојано се менуваат, важно е да се истражат алтернативи на традиционалниот модел на работа за да се обезбеди оптимално физичко здравје, да се зголеми продуктивноста и да се подобри рамнотежата помеѓу работата и приватниот живот.
Иако концептот на четиридневна работна недела или намалено работно време до неодамна се сметаше за експериментален, истражувањата сè повеќе ги откриваат неговите позитивни ефекти врз вработените.
Новото истражување на Универзитетот А&М во Тексас го продлабочува разбирањето за тоа како прилагодувањето на работното време може да резултира со значителни подобрувања во продуктивноста.
Традиционалниот модел на петдневна работна недела, со полно работно време од 09:00 до 17:00 часот, можеби изгледа како стандард, но излегува дека тоа не е нужно најефикасниот начин за организирање на работата.
Истражувањата покажаа дека продуктивноста опаѓа како што се ближи крајот на работната недела и како што одминува денот, а петок е најпредизвикувачкиот ден.
Според истражувањето на Универзитетот A&M, 789 канцелариски работници биле следени во период од две години за да се анализира нивната работна активност, брзината на пишување и стапката на грешки. Резултатите недвосмислено покажаа дека работниците побрзо типуваат и помалку грешат во раните утрински часови и во текот на понеделник до четврток.
Сепак, во текот на попладневните часови овие статистики се намалуваат, додека грешките се зголемуваат. Најлошиот ден во однос на продуктивноста и грешките се покажа петок, со слаби перформанси во петокот попладне.
Работниот модел на четиридневната работна недела им овозможува на работниците да се прилагодат на природниот ритам, да го користат „најдоброто време“ во текот на работниот ден и да избегнуваат „прегорување“.
Исто така, истражувањата покажаа дека скратената работна недела го намалува стресот, го зголемува задоволството на вработените и промовира подобра рамнотежа помеѓу работата и приватниот живот.
Дополнително, се поголем број организации експериментираат со флексибилни работни аранжмани како што се работа од дома и намалување на бројот на работни денови.
Овие пристапи го намалуваат стресот поврзан со патувањето на работа, помагаат во заштеда на енергија и време и придонесуваат за поголема работна ефикасност.
Задоволните работници кои имаат повеќе време за своите семејства, рекреација и хоби веројатно ќе покажат поголем ентузијазам за работа, намалено боледување и подобра ментална благосостојба.
