Пензиите тешко ги покриваат зголемените трошоци во тековниот месец велат пензионерите. За да се покријат сметките и потребните лекови се крати од храната.
Граѓаните кои што ги анкетирале од АЛСАТ-М велат дека со 12 илјади денари пензија не се живее, бараат раст на пензиите за да може да се покријат сите трошоци.
„Треба да пораснат пензиите, народот остана во лоша состојба нема ништо , со 200 евра што да купам попрво, лекови или храна, имам болки во грбот а немам пари да платам за ортопедски услуги, не знам што прави Владата“.
„Многу е скапо, не можеме да излеземе на крај со пензиите, нас ни се ниски пензиите. 20 илјади да бидат барем, да платиш струја, вода, телефон, инаку ќе се откажеме од многу работи и од телефон и од струја. И сок не можеш да си купиш сега, банани, овошје, од се ќе се откаже човек“.
„Има и по 70 илјади и по 50 илјади пензија, а некој 10 илјади. Јас сум работел 40 години,17 илјади пензија имам ако се покачи малку ќе биде, на тој што има не треба да му се дава многу големи пензии има. Со мојата работа 500 евра треба да биде. Не кратам од ништо ама чувам пчели, и со тоа се издржувам инаку со оваа пензија ништо“.
Од здружението на пензионери велат дека се во преговори за промена на моделот за пресметка на пензијата, а власта има слух за нивните барања.
„Заради подобрување на материјалниот статус на пензионерите Сојузот бара да се промени формулата за усогласување на пензиите, односно пензиите да се усогласуваат со дел од порастот на трошоците на животот и дел со порастот на платите на вработените, земајќи го во предвид поповолниот процент“, велат од Здружение на пензионери.
Од Министерството за труд велат дека заложбата ќе биде дополнително зголемување на пензиите. Следува период на експертска дебата за да се изнајде соодветно зголемување на пензиите
Според последните податоци во земјава има 329 илјади пензионери.
Андреа Чобанова АЛСАТ М