Во изминатиот месец Антарктикот беше погоден од рекордно високи температури и невообичаено големи количества снег кои паднаа во некои региони. Ваквите екстремни појави на научниците им поставија многу прашања, а малку одговори.
Мразот што го покрива Антарктичкото Море беше 26 отсто под просекот минатиот месец. Ова е, ако се погледне историјата, второто најмало ширење на мраз некогаш забележано.
Што се однесува до температурата, Источен Антарктик претрпе еден вид топлотен бран минатиот месец кога температурата се искачи до минус 11,5 степени Целзиусови, што е далеку потопло од просекот во оваа област кој изнесува околу минус 55 степени.
Истражувачката станица Конкордија се наоѓа на околу илјада километри од морето и на три илјади метри надморска височина и е опкружена со длабока ледена пустина. Тоа се промени во средината на март. Покрај тоа што температурата достигна историски рекорд од минус 11,5 степени, наврнаа и околу 10 сантиметри снег, што е повеќе отколку што паѓа во текот на целата година.
„За оваа епизода можевме да си дозволиме да излеземе многу полесно облечени, откривајќи го лицето и едноставно облечени во маица со долги ракави со добро руно на врвот и тоа беше доволно за да останеме надвор многу долго. Навистина е невозможно под нормални мартовски услови“, го опиша своето искуство, Џулиен Витвики, истражувач во Конкордија.
Научниците објаснуваат дека поголемите количини на снег што паѓаат на Антарктикот се должат на глобалното затоплување. Кога атмосферата ќе се загрее, може да содржи повеќе влага, а повеќе влага значи повеќе снег, пренесува Euronews.
Инаку, март 2022 година беше за 0,39 степени потопол од светскиот просек во периодот 1991-2020 година, со што беше петти најтопол забележан март на глобално ниво. Сепак, просечната температура во Европа беше за 0,43 степени пониска, што го направи март 2022 година трет најстуден во изминатите десет години.
