Топлинската изолација на станбена зграда, според проценките на експертите, заштедува енергија и до 50 отсто, па иако оваа инвестиција по сегашни цени за куќа со просечна големина од 60 метри квадратни изнесува околу 2.500 евра, во иднина таа ќе ja преполови сметката за струја или количината на дрва, јаглен и пелети потребни за затоплување на домот во текот на зимата.
Зачестените, а годинава поради светската енергетска криза, рекордни поскапувања на енергетските производи, граѓаните, особено, оние кои живеат во куќи, се доведуваат во позиција да размислуваат на кој начин да ги намалат трошоците за греење. Во повеќето случаи, прекумерната потрошувачка на електрична енергија во текот на зимата или значително поголемите количини на цврсто гориво што се користи за загревање на домот се резултат на лошата или отсутна изолација на станбената зграда. Поради ова, топлинската изолација на куќата, иако не е евтина инвестиција, значително ги намалува сите трошоци за греење во иднина.
Како што објаснуваат градежните експерти, на пазарот може да се најдат различни материјали за изолација, од стиропор до камена или стаклена минерална волна, чија заедничка цел е да се заштеди потребната количина на енергија и да се спречи загубата на топлина во домот. Кај нас, кога станува збор за изолација на помали објекти како што се семејните куќи и ниските станбени згради, најчесто и популарно решение е поставувањето на демит фасада, што подразбира контактен фасаден систем составен од слоеви на лепак, полистирен, армирачка мрежа за заштита од атмосферски влијанија.
За примена на овој најзастапен систем за топлинска изолација, кој се покажа како најефикасен, по моментални цени на материјалите на пазарот, потребно е да се издвојат од 22 до 25 евра за квадратна ѕидна површина. Ова е цената во која е вклучена „десетката“ стиропор, односно стиропорот со дебелина од 10 сантиметри кој најмногу се користи, потоа фасадата на локалниот производител, мрежата, лепакот, клиповите и секако работата на мајсторот.
Како што додававаат експертите пресметката на инвестицијата за поставување изолација за семејна куќа со просечна квадратура од 60 метри квадратни, која има фасада од 100-110 метри квадратни, изнесува од 2.500 до 3.000 евра.
- Поставувањето на топлинска изолација е работа која во зависност од големината на објектот може да трае од пет до 25 дена, но ако зборуваме за просечна квадратура на куќата, тогаш може да се заврши за 7 до 10 дена. . Идеални временски услови за работа се надворешната температура од 10 до 20 целзиусови степени, се разбира без врнежи, додека најдобар временски период за оваа работа, која е навистина исплатлива за домаќинството поради намалувањето на сите други трошоци, е април и првата половина на мај, како и септември и октомври – истакнуваат градежните експерти.
Во однос на станбените згради, според градежниците, постојат неколку параметри кои ја разликуваат реализацијата и цената на работата, од тоа дали е потребно малтерисување на старата дотраена фасада пред да се постави изолацијата, до тоа дали стиропорот се поставува на бетон, блок, ѕид од тули па се до употреба на скелиња.
Врз основа на понудите што фирмите што ги изведуваат овие работи ги испорачуваат до станбените заедници, цената на топлинската изолација по метар квадратен ѕид чини од 22 до 24 евра, работата зависи од квадратурата на објектот, но најмногу , за постари згради до четири ката и 20 станови може да се завршат во рок од два месеци.
