Скоро цела една година помина откако во Скопје беа поставени електрични тротинети за изнајмување, но сепак овој вид градски превоз некако не заживеа помеѓу скопјани.
На скопските улици сè поретко се забележуваат луѓе кои ги користат јавните електрични тротинети, кои се наменети за кратки релации и за забава.
Зошто е тоа така? Кои се предностите и недостатоците на овој начин на превоз? Како се однесуваат граѓаните и властите кон електричните тротинети?
Еден од жителите на Аеродром, кој сакаше да остане анонимен, ни кажа дека на почетокот му се допаднала ваквата идеја и овој начин на превоз, но потоа сфатил дека е неисплатливо за секојдневна употреба.
Тој вели дека цената од 9 денари по минута е превисока за наши стандарди, со оглед на тоа што градот нема изградено инфраструктура за тротинети и возењето е отежнато и бавно.
„Мислев дека ќе биде практично и згодно да се возам со тротинет до работа или до центарот, но се разочарав. Понекогаш нема слободни тротинети во близина, понекогаш се расипани или немаат батерија. А и да најдеш еден, мораш да внимаваш од коли, автобуси, пешаци, велосипедисти, дупки на патот, тротоари… Не е безбедно, а ни евтино. За истото време и со истите пари можам да се возам со такси или со јавен превоз, кои се покомфорни и побрзи”, ни кажа тој.
Опаѓањето на интересот за употреба на електричните тротинети можеби е резултат и на сезонските фактори, односно студеното време, но по сè изгледа дека тие полека ја губат својата популарност кај скопјани.
Дали тоа ќе се промени во иднина, зависи од многу фактори, како што се цената, квалитетот, безбедноста и одржливоста на овој вид превоз. Засега, електричните тротинети во Скопје се повеќе мода, отколку потреба.
Во однос на цените, сметано во денари, во Берлин една минута возење со јавен електричен тротинет чини 12 денари.
Во Барселона една минута чини 15 денари, во Лисабон е 10 денари, во Тулуз е најскапо и изнесува 16 денари.
Во земјите од регионот, најскапа е минутата во Загреб и во Софија, каде што изнесува 16 денари. Потоа следува Тирана со 11 денари, Белград со 10 денари и Скопје со 9 денари.
За да ги користат тротинетите, граѓаните треба да симнат мобилна апликација на своите телефони, да уплатат одредена сума и да го лоцираат најблискиот слободен тротинет на мапата. Тротинетот се отклучува со апликацијата и може да се вози во рамки на дозволените граници кои се означени на мапата.
