Со приближувањето на Новата година, цените на становите за изнајмување растат во сите големи градови во земјава.
Според податоците од агенциите за недвижности, овој декември бележи скок на цените за дури 50 проценти во однос на лани. И покрај поскапувањето, побарувачката останува висока, особено кај младите кои планираат прослава на најлудата ноќ со пријателите во приватен простор.
„Минатата година цените за еднособен стан беа околу 60 евра за вечер по човек, додека сега ретко може да се најде нешто под 90 евра. За поголемите станови, цените одат и до 150 евра за ноќ. Интересно е што луѓето, и покрај сè, подготвени се да платат за да поминат убаво со најблиските“, изјави Кристина Т., агент за недвижности од Скопје.
Најголема побарувачка има за станови во централното градско подрачје, како и во популарните туристички места. Според сопствениците, овие станови се резервираат уште во првата половина од декември.
Побарувачка и кај студентите и кај младите брачни парови
Давор Милевски, сопственик на стан кој редовно го издава за новогодишни прослави, вели дека интересот оваа година е огромен:
„Секогаш има интерес за мојот стан во Карпош. Го опремив дополнително за овој период од годината – декорации, нова аудио-опрема, и тоа се покажа како паметна инвестиција. Веќе три недели однапред станот е издаден“.
Младите гледаат на изнајмувањето како добра можност да прослават во помирна атмосфера, далеку од гужвите на рестораните и клубовите.
„Со четворица пријатели решивме да собереме пари и да изнајмиме стан за Нова година. Излезе поскапо од лани, но сакаме убаво да се опуштиме без да мислиме на ограничувања. Исто така, цениме што сме само ние, без непознати луѓе околу нас“, раскажува Стефан Петровски, студент од Скопје.
Сопствениците во дилема – да ја зголемат цената или не
Сопствениците на станови се обидуваат да го најдат балансот помеѓу понудата и побарувачката.
Иако цените се значително повисоки, некои сопственици остануваат претпазливи.
„Разбирам дека економската ситуација е тешка и не сакам да претерам. Сепак, дополнителните трошоци за чистење и одржување по новогодишните забави се поголеми. Неретко, гостите знаат да претеруваат со прославите, па затоа мора да ја оправдам цената“, додава Елена Јованова, која издава стан во Охрид.
Според економските аналитичари, поскапувањето не е изненадување. Тие укажуваат на инфлацијата и зголемените животни трошоци како главни причини. Но, од друга страна, традицијата да се прослави новата година со стил останува непроменета. И покрај сите предизвици, се чини дека граѓаните се подготвени да платат повеќе за да создадат убави спомени за новата година.
Останува прашањето дали оваа тенденција ќе продолжи и следната година или зголемувањето на цените ќе ги натера граѓаните да бараат поевтини алтернативи.
Извор: denar.mk
