Додека некои ќе ја дочекаат Новата година дома или во соседните земји, дел од граѓаните се подготвени да издвојат значителни суми за уникатно искуство на егзотични дестинации.
Според туристички агенции во земјава, оваа година најголем интерес има за бањите во Србија, но во исто време Дубаи се издвојува како една од најексклузивните новогодишни дестинации за која дел од Македонците ќе платат и до 2.000 евра.
Туристичкиот агент Жарко од една скопска агенција потврдува дека интересот е зголемен и за блиските и за далечните дестинации.
„Секоја година Македонците сè повеќе сакаат да избегаат од рутината и Новата година да ја поминат на поинаков начин. Бањите во Србија остануваат најдостапна опција, каде за неколку ноќевања со транспорт цената се движи меѓу 150 и 300 евра. Сепак, имаме и клиенти кои бараат ‘лукс’ пречек и не жалат пари за егзотика како Дубаи или Истанбул. За Дубаи, пакетите за четири ноќи, вклучувајќи авионски билет и хотел, достигнуваат околу 2.000 евра, а побарувачката е зачудувачки голема“, вели нашиот соговорник.
Дубаи – симбол за гламурозен пречек
Покрај бањите во Србија и познатите градови во соседните земји, Дубаи станува омилена дестинација за оние кои сакаат раскош и екстраваганција.
Луксузни хотелски комплекси, светски познатите огномети на Бурџ Калифа и ноќни забави се само дел од причините зошто се плаќа висока цена.
Жаклина Поповска, жителка на Скопје, која веќе го резервирала своето патување за Дубаи, вели дека ова „патување е остварување на нејзиниот сон“.
„Цела година напорно работев и решив да се почестам. Можеби звучи многу, но 2.000 евра за четири ноќи не се само ноќевања. Тоа е искуство кое не се заборава – огромни огномети, луксузен хотел, специјална новогодишна вечера. Сакам да ја дочекам годината на големо“, вели Жаклина.
Најголем интерес за соседните земји
И покрај луксузните пакети, сепак најголем број граѓани ќе ја пречекаат Новата година во соседните земји, каде цените се поприфатливи.
Грција, Црна Гора и Србија остануваат најбараните дестинации.
„Будва и Котор се хит дестинации секоја година, особено кај младите кои бараат добра забава. Пакетите се движат од 200 до 400 евра со превоз и сместување. Белград е класика за оние кои сакаат традиционални новогодишни прослави со музика и вкусна храна“, објаснува туристичкиот водич.
Тој истакнува дека и Загреб бележи зголемена посетеност, особено поради новогодишниот базар кој привлекува голем број туристи од Балканот.
Младите одбираат забава, семејствата релаксација
Интересно е тоа што различните категории патници имаат свои преференци.
Младите најчесто се одлучуваат за градови каде забавата трае цела ноќ, додека семејствата избираат мирни бањи или луксузни хотели.
„Со семејството одиме во Врњачка Бања. Не е скапо, а има одлична храна, базени и програма за децата. Новата година е семеен празник, па сакаме сите заедно да се опуштиме“, вели Соња Костовска, мајка на две деца од Битола.
Тренд на патување за празниците
Македонците се подготвени да издвојат пари за квалитетен пречек надвор од земјава.
Трендот на патување за празниците расте со секоја година, што ја прави туристичката индустрија еден од главните двигатели на економијата во периодот околу Новата година.
Без разлика дали пречекот ќе биде во Дубаи, Белград или дома, едно е сигурно – желбата за нови искуства и уживање во празничниот дух не познава граници.
