Просечната каматна стапка на вкупните кредити веќе неколку месеци бележи надолен тренд, што укажува на мало, но значајно намалување на притисокот врз кредитокорисниците. Во ноември е регистрирано намалување од 0,02 процентни поени, а годишниот пад изнесува 0,12 п.п., при што стапката се задржува на ниво од 5,36%.
Годишно намалување е забележано и кај новоодобрените кредити, за 0,56 п.п., иако месечно има минимално зголемување од 0,01 п.п., достигнувајќи просечна стапка од 4,82%.
Од друга страна, просечната каматна стапка на вкупните депозити бележи раст. Таа достигна 2,12%, со годишно зголемување од 0,38 п.п. и месечен раст од 0,05 п.п. Исклучок се новите депозити, каде стапката во ноември е пониска за 0,04 п.п.
Каматната стапка на вкупните кредити за граѓаните остана непроменета во ноември, на 5,66%, додека на годишно ниво е забележано зголемување од 0,07 п.п. Кај новоодобрените кредити на домаќинствата, стапката изнесува 5,03%, со месечен пад од 0,14 п.п. и годишно намалување од 0,32 п.п., што се должи на пониските камати кај денарските кредити.
Каматните стапки на депозитите на домаќинствата бележат месечно зголемување од 0,03 п.п., достигнувајќи 2,05%, што е резултат на повисоките стапки кај денарските и девизните депозити. Годишниот раст изнесува 0,36 п.п. Новите депозити имаа просечна стапка од 2,88%, со месечен пад од 0,01 п.п., поради намалување на каматите за странска валута. На годишно ниво, стапката е повисока за 0,42 п.п.
Во корпоративниот сектор, просечната каматна стапка на вкупните кредити во ноември изнесуваше 5,05%, со месечно намалување од 0,04 п.п. Намалувањето на годишно ниво е 0,31 п.п., како резултат на падот кај сите типови кредити. Новоодобрените кредити на компаниите имаа стапка од 4,68%, со месечен раст од 0,03 п.п. и годишен пад од 0,71 п.п.
Каматната стапка на вкупните депозити на корпоративниот сектор во ноември изнесуваше 2,68%, со месечен раст од 0,26 п.п. и годишно зголемување од 0,45 п.п. Новите депозити на компаниите забележаа стапка од 2,43%, со месечно намалување од 0,32 п.п. и годишно зголемување од 0,72 п.п.
Извор: pari.com.mk
