Снежната покривка во населените места во земјава ги изнесе на терен јавните комунални претпријатија со нивната механизација и веќе два дена се расчистува снегот на улиците низ градовите.
Градоначалници од повеќе општини редовно известуваат за активностите кои се превземаат за чистење на улици кои водат до јавни институции, како градинки, здравствени домови, плоштади и фреквентни улици, како и патишта кои водат до населени места.
Но, како што раскажуваат дел од градоначалниците, и граѓаните треба да се вклучат во расчистувањето, посебно приватниците кои имаат објекти како продавници, канцеларии и угостителски локали, и самите да допринесат така, што ќе го расчистат снегот пред објектите.
И според Закон за јавна чистота, во зимски услови при снежни врнежи сите сопственици, односно корисници на објекти се должни веднаш да започнат со чистење на снегот на отворените простори пред јавните објекти, со што ќе се обезбеди непречен пристап до објектите.
Одредени се и глоби за правното лице доколку не обезбеди редовно и квалитетно одржување на јавната чистота и чистење на снегот во зимски услови на јавните површини. Станува збор за глоба од 500 до 1.000 евра во денарска противвредност.
Во многу земји во светот, освен сопствениците, односно корисниците на јавни објекти, дури и граѓаните се должни да го расчистат снегот пред својот влез во зграда и да обезбедат безбедно движење.
Во некои американски држави, на пример, казните за неисчистен снег пред влез на зграда се движат од 50 до 150 долари, во зависност од бројот на станарите.
