Apple и понатаму е на врвот како највреден бренд во светот, покажува најновиот извештај на Brand Finance, водечката консултантска компанија за вреднување на брендови. Според извештајот, вредноста на брендот на Apple за 2025 година достигнала 574,5 милијарди долари, што претставува раст од 11% во однос на претходната година.
На второто место се наоѓа Microsoft со вредност од 461,1 милијарда долари, бележејќи раст од импресивни 35%. Следуваат Google (413 милијарди долари) и Amazon (356,4 милијарди долари), додека Walmart ја заокружува првата петорка со раст од 42% и вредност од 137,2 милијарди долари.
Во извештајот се истакнува дека четири од петте највредни брендови се од технолошкиот сектор, што ја нагласува доминацијата на технологијата во глобалната економија.
Најбрзорастечки брендови
Покрај вредноста, Brand Finance анализираше и кои брендови забележале најголем раст од 2020 година. TikTok е еден од лидерите со раст од 79% во последните четири години, достигнувајќи вредност од 105,8 милијарди долари.
Американските брендови DraftKings и FanDuel, кои профитираат од легализацијата на онлајн коцкањето во САД, забележаа исклучителен раст. NVIDIA, AMD и TSMC, како водечки брендови од секторот на полупроводници, исто така, покажуваат значителен напредок.
Извештајот открива дека американските брендови сочинуваат повеќе од половина (52,9%) од вкупната вредност на светските брендови, следени од Кина со 15% и Германија со 5,8%.
Покрај вредноста, Brand Finance ја анализираше и силата на брендот. WeChat е прогласен за најсилен бренд со индекс на сила од 95,2 од можни 100 поени.
Извор: Brand Finance
