Речиси секојдневно во полицискиот билтен се нотирани случаи на измамени граѓани. Шемата е иста или слична. Им се јавуваат на телефон, обично на повозрасни луѓе и ги плашат дека нивни деца направиле сообраќајни несреќи, па за да не одат во затвор мора да предадат пари за да се спречи казната.
Последниот случај е од завчера кога две повозрасни скопјанки, во одделни случаи, биле нови жртви на телефонски измами - им јавиле дека наводно ќерките прегазиле деца мигранти.
И од Министерството за внатрешни работи информира дека до нив во изминатиов период од страна на граѓани се пријавени повеќе кривични дела „измами“ со лажни сообраќајки кои се извршени врз повозрасни лица.
„Сторителите ги доведуваат во заблуда лицата на тој начин што им се јавуваат телефонски и им се претставуваат како службени лица, најчесто полициски службеници, и од нив бараат финансиски средства за ослободување од кривичен прогон на нивни деца или внуци кои, наводно, непосредно пред јавувањето направиле сообраќајна несреќа со смртни последици. Измамниците ги контактираат жртвите најчесто на фиксен телефон, но има случаи каде што се контактирани и преку мобилен телефон со скриен број, а за да бидат поуверливи во позадина се слуша глас кој бара помош“, велат од МВР.
Министерството за внатрешни работи ги известува граѓаните дека се преземаат мерки и активности за расчистување на досега пријавените кривични дела и воедно апелираат до граѓаните да не наседнуваат на ваквиот вид на измами, а доколку бидат контактирани, веднаш да пријават во полиција.
