Најголемата светска компанија за храна и пијалоци воведува уште поголеми зголемувања на цените за своите производи, бидејќи растат трошоците за суровина и превоз.
„Nestlé“, која продава сѐ, од сладолед до кафе и житарици, вели дека ќе одговори на повисоките трошоци за производство со зголемување на цените во втората половина.
„Инфлацијата практично отсуствуваше со години, а потоа се зголеми многу нагло. Тоа директно нѐ погоди“, изјави извршниот директор Марк Шнајдер, цитиран од „CNN Business“.
Шнајдер, исто така, рече дека смета дека инфлацијата е привремена. Сепак, компанијата, која поседува брендови како „Nescafe“, „Gerber“ и „Cheerios“, вели дека ќе треба да ги зголеми цените за скоро 2% за да го надомести зголемувањето на трошоците од 4%. „Nestlé“ ги зголеми цените за 1,3% во првата половина на 2021-ва година.
„Компанијата може да се заштити од некои зголемувања на трошоците, како што е зголемувањето на цените на кафето. Сепак, не може да ги избегне зголемените трошоци за работи како транспортот, кои вршат притисок врз профитната маржа“, смета Шнајдер.
Од компанијата велат дека очекуваат профитната маргина од 17,5% во оваа година, што претставува благ пад. Сепак, компанијата ја зголеми прогнозата за раст на продажбата за 2021-ва година на помеѓу 5% и 6%.
Голем број компании од „General Electric“ до „Anheuser-Busch InBev“ и „Unilever“ предупредуваа во изминатите недели за зголемени трошоци за суровините, бидејќи глобалната економија се опоравува од пандемијата на коронавирусот. Побарувачката за некои производи нагло порасна кога луѓето ги продолжија патувањата и почнаа да се враќаат во канцелариите, а глобалните синџири на снабдување останаа под притисок.
Некои компании успеваат да се заштитат од зголемените цени, како што се купување фјучерси на некои стоки или избирање на повисоки трошоци. Сепак, други ги пренесуваат зголемените трошоци на потрошувачите, што доведува до повисоки цени во супермаркетите, рестораните и трговците на мало.
Конкурентот на „Nestlé“, „Unilever“, минатата недела објави дека ги зголемува цените на повеќе пазари и категории на производи како одговор на повисоките трошоци за суровини. Сопственикот на брендови како „Ben & Jerry’s“ како пример ги наведе цените на соја маслото, кои пораснаа за 20% во последниот квартал и сега растат за 80% во споредба со претходната година. Цените на палминото масло се за 70% повисоки од нивниот долгорочен просек.
„Нашата инфлација се рефлектира во целиот спектар на материјал, пакување и, доста значајно, трошоците за товарот и дистрибуцијата“, рече финансискиот директор на „Unilever“, Греам Питкели, претходно овој месец. „Ние веќе ги користиме сите лостови во однос на цените и штедењето и ќе продолжиме да го правиме тоа“, додаде тој.
Големото прашање е дали недостатоците и зголемувањето на цените се привремен резултат на пандемијата, или дали глобалната економија се менува на начин што трајно може да ги зголеми трошоците за водење бизнис и да започне нова ера на инфлација што може да ја намали куповната моќ.
Централните банки, вклучително и Федералните резерви, се борат да одговорат. Многу економисти веруваат дека зголемувањето на цените е едноставно привремено, но доколку се погрешни, централните банки ќе бидат принудени нагло да ја повлечат поддршката за економиите подоцна во текот на годината за да ја контролираат инфлацијата.
