Во срцето на Скопје, постои едно место кое станува сè попопуларно меѓу жителите на градот, особено за време на викендите.
Станува збор за селото Кучково, кое, меѓу другото, со својата чешма во центарот на селото, привлекува голем број луѓе кои сакаат да се снабдат со свежа планинска вода за пиење.
„Чешмуву гу напрај Вељко со селаните“. Ако го читате овој натпис, вие сте на вистинското место. Тоа е познатата кучковска чешма каде што доаѓа половина Скопје за да полни студена вода.
Според локалните жители, водата од оваа чешма е позната по својата чистота и освежителен вкус, што ги наведува многумина да дојдат до Кучково и да наполнат шишиња, наместо да купуваат флаширана вода од продавница.
Еден од редовните посетители на чешмата е жител на Ѓорче Петров, кој сподели дека секоја недела оди до Кучково за да наполни пластични шишиња со вода.
„Водата тука е многу убава, вкусна и студена, и најважно, без бигор“, вели тој, изразувајќи го своето задоволство од квалитетот на водата.
Не е само тој кој ги цени квалитетите на водата од Кучково.
Еден жител на Карпош, кој го затекнавме како полни шишиња со вода во Кучково, откри дека откако за првпат ја пробал водата пред неколку години, повеќе не купува флаширана вода.
„Оваа вода е нешто посебно. Секој месец одвојувам време за да дојдам тука и да наполнам доволно вода за целиот месец“, ни изјави тој.
Оваа тенденција не е само знак за квалитетот на водата во Кучково, туку и за растечката свест за значењето на природните ресурси и потребата од одржливо користење на истите.
Во време кога здравјето и екологијата стануваат сè поважни, жителите на Скопје се обидуваат да најдат начини да живеат во хармонија со природата, а водата од Кучково е симбол на таа хармонија.
