Соочувањето со дефект во домот може да биде фрустрирачко искуство, особено ако еден од најчестите проблеми – недостатокот на слободни мајстори – го прави решавањето на ситуацијата уште потешко.
Последниве години, Македонија бележи сериозен недостиг на квалификувани мајстори, вклучително водоинсталатери, електричари и ѕидари, а оние што се достапни се со полни раце работа, честопати до максимум.
Поради зголемената побарувачка и ограничената понуда, многу граѓани мора да чекаат со денови или дури и со недели за основни поправки во нивните домови.
„Во Македонија се забележува значителен недостаток на мајстори, особено на квалификувани водоинсталатери и електричари, бидејќи многу млади не се одлучуваат за овие професии. За разлика од минатото, сега има помал интерес за занаетчиски професии, бидејќи младите повеќе се насочуваат кон високообразовни установи и работа во други сектори“, објаснува економистот и пазарен аналитичар Ведран Кузмановски.
Според него, помалку луѓе одлучуваат да влезат во занаетчиските професии, што доведува до раст на побарувачката и тешкотии за корисниците на нивните услуги.
Овој тренд се одразува и на водоводџијата Ристо Трајков, кој веќе 15 години работи во Скопје и околината.
„Работиме буквално секој ден, немаме слободен ден. Кога ќе ме повикаат за нешто како замена на славина или проверка на запушени цевки, клиентите најчесто треба да чекаат два-три дена, што е многу, но таква е ситуацијата. Луѓето често ме прашуваат зошто не вработам помошник, но тешко е да најдеш некој што сака да го работи ова“, вели Трајков, кој често добива итни повици за дефекти во текот на ноќта и за време на викендите.
Покрај недостатокот на работна сила, фактор кој исто така ја зголемува побарувачката е миграцијата на занаетчии кон земјите на Западна Европа, каде платите за мајсторските услуги се значително повисоки.
Според процените, недостигот на мајстори ќе продолжи да расте, освен ако државата не преземе мерки за поддршка на овие професии.
„Треба да се размисли за субвенции за младите кои би сакале да станат мајстори или за отворање на специјализирани училишта и курсеви кои ќе ги обучат за вакви вештини. Ова ќе им помогне да останат во земјата и да развијат кариера со добри приходи – препорачува Кузмановски.
Со оглед на ова, постои потреба од зголемување на атрактивноста на занаетчиските професии за младите, преку едукативни програми и субвенции.
Ваквите мерки би помогнале не само да се зголеми бројот на квалификувани мајстори, туку и да се обезбеди поддршка за граѓаните кои се потпираат на нив за решавање на секојдневни проблеми во домот.
