Граѓаните на Холандија се добро познати по грижата за животната средина и природата, а тоа го докажува и натпреварот во кој секоја година жителите се натпреваруваат во озеленување на своите дворови.
Натпреварот за отстранување на плочки и бетон, локално наречен „tegelwippen“, го осмисли креативната агенција „Френк Ли“ во 2021 година, со цел да ги поттикне граѓаните да ги озеленат урбаните простори.
„Тегелвипен“ сега може да се нарече национален спорт, а жителите се трудат да ги заменат бетонските делови од своите градини и дворови со растенија или дрвја. Потоа, своите резултати треба да ги објават на социјалните мрежи.
„Кога плочките се заменуваат со трева, цвеќе или дрвја, Холандија станува поотпорна на климатските промени, попогодна за инсекти и животни, поладна во текот на жешките денови и, следствено, многу поубава“, стои во објаснувањето. Дополнително, „сакавме да се оттргнеме од сивилото кон зеленило. Затоа што тоа ве прави посреќни“.
Холандија, исто така, е под удар на екстремни временски услови, а силните дождови значително ги оптоваруваат локалните канализациски и одводни системи, така што помалку бетонски површини може да направат голема разлика во собирањето вода.
Успехот на овој проект го потврдува податокот дека во текот на 2024 година во Холандија биле отстранети 5,5 милиони плочки, што претставува нов рекорд.
Повеќе од 200 општини се натпреваруваа во периодот од 21 март до 31 октомври. Отстранетите бетонски плочки бесплатно ги собираат локалните власти со возила кои истовремено доставуваат и цвеќе за садење.
Во овој необичен, но корисен натпревар постои едно важно правило – не е дозволено отстранување на јавни бетонски површини.
Оние кои немаат двор или градина можат да побараат дозвола од властите за создавање „фасадна градина“ – зелена лента помеѓу тротоарот и фасадата на нивниот имот.
Минатогодишни победници беа општините Венло, Влардинген и Халдерберг, кои отстранија најмногу плочки по глава на жител и со тоа ја освоија симболичната награда – златна лопата.
Венло, исто така, ја доби и „златната плочка“ за најмногу отстранети плочки – 414.395.
Извор: eupravozato.mondo.rs
