Информацијата дека порасна цената на петлите и на кокошките нема да им се допадне на оние кои практикуваат да се хранат со здрава и органска храна.
Но, во последните месеци, цените на селските петли доживеаја значителен скок. Од некогашните 500 денари, сега цената за едно селско петле достигна минимум 800 денари, а на некои места и до 1.000 денари.
Оваа промена предизвика загриженост кај потрошувачите, особено кај оние кои инсистираат на органска исхрана.
Меѓу нив е и Елена, мајка на две деца од Скопје, која се обидува да обезбеди здрава исхрана за своето семејство.
„Супата од селски петел е нешто што често го подготвуваме дома. Таа е полна со нутриенти и е важен дел од исхраната на моите деца” изјави таа.
Елена набавува петли директно од селата околу Скопје и Велес, каде што фармерите ја уверуваат дека не користат конзерванси во храната на живината.
„Секогаш барам директен контакт со локалните производители за да бидам сигурна во квалитетот на храната што ја внесуваме” додаде таа.
Но, со скокот на цените, Елена и многу други како неа се соочуваат со тешкотии да ги задржат истите прехранбени навики.
„Сега, со цените кои се движат од 800 до 1.000 денари, морам да размислам двапати пред да купам”, изјави таа со загриженост.
Овој тренд на зголемување на цените не е изолиран случај и се одразува на широк спектар на производи, вклучувајќи и основни животни потреби.
Семејствата се принудени да преиспитаат своите буџети и да бараат алтернативни решенија за да се справат со растечките трошоци во животот.
