Белград ќе ги замени тролејбусите со електрични автобуси за поефикасен и модерен јавен превоз

Советниците на градското собрание на Белград донесоа одлука за замена на постојните тролејбуски линии со електрични автобуски линии.

Советниците на градското собрание на Белград денеска ја донесоа Одлуката за усвојување на самоиницијативниот предлог на проектот за јавно-приватно партнерство за вршење на комунални дејности на градскиот превоз на патници на територијата на град Белград, односно за замена на постоечки тролејбуски линии со електрични автобуски линии.

Се додава дека многу линии се во лоша состојба, со застарени столбови и жици кои со години не се обновуваат, што предизвикува чести технички проблеми и го забавува и отежнува секојдневното функционирање на системот, а возниот парк е стар и неефикасен.

Сето тоа доведува до чести прекини во сообраќајот и незадоволство на патниците, се нагласува во образложението на Одлуката. Исто така, се посочува дека системот на тролејбус е во голема мера неефикасен во споредба со другите, посовремени форми на јавен превоз.

Како што се наведува, белградското градско сообраќајно претпријатие располага со 92 тролејбуси чија просечна старост е над 15 години, а последната набавка е направена пред 13 години.

Замената на тролејбуските линии со електрични автобуски линии би претставувала значајна промена во системот на јавен транспорт, чија цел е да се подобри ефикасноста, да се намалат трошоците и да се приспособат на сегашните еколошки стандарди. Како што е наведено, електричните автобуси ќе ги заменат постојните тролејбуски линии, но со поголем фокус на флексибилноста и ефикасноста.

Се додава дека електричните автобуси се генерално поевтини за одржување од тролејбусите, бидејќи имаат помалку подвижни делови и не зависат од напонската мрежа.

Извор: nezavisen.mk