Северна Кореја повторно ќе биде отворена за туристи, речиси пет години по затворањето на границите поради пандемијата на коронавирусот. Засега е познато дека сите патници се добредојдени, освен државјаните на САД и Јужна Кореја.
Странски туристички агенти за првпат по затворањето на границите во 2020 година влегоа во Северна Кореја за да посетат нови туристички локации. Персоналот на туристичката агенција Koryo Tours го посети граничниот град Расон во рамките на специјално патување наменето само за нивните вработени, бидејќи земјата сè уште не е целосно отворена за туризам.
Целта на посетата беше разговор со локалните партнери, инспекција на нови туристички места и собирање информации за моменталната состојба во туристичкиот сектор. Агенцијата изрази надеж дека наскоро ќе може да го потврди отворањето на Расон за странски туристи.
Оваа вест доаѓа во момент кога Северна Кореја покажува знаци на постепено отворање кон светот, првенствено преку соработка со Русија минатата година. Туристичките агенции Koryo Tours и Young Pioneer Tours минатиот месец најавија дека Северна Кореја ќе дозволи влез за туристи од Кина и други земји, освен од САД и Јужна Кореја.
А сега, прашање за вас – дали би се осмелиле да ја посетите оваа земја?
