Конкурсот е отворен до 1 септември 2021 година, а како што посочуваат локалните власти и дел од стручната фела која го иницираше ова решение, има за цел да најде компромис меѓу приватниот и јавниот интерес и да воспостави нова пракса во урбанистичкото планирање.
Конкурсот за избор на идејно решение за локацијата кај поранешната фабрика „Треска“ во центарот на Скопје од денеска е објавен на Електронскиот систем за јавни набавки и на веб-страницата на Општина Центар.
Со конкурсот Општината планира да ја спречи реализацијата на стариот Детален урбанистички план од 2012 година, кој со падот на мораториумот се врати во сила, а со кој се предвидува на оваа локација да никнат триесетина згради.
Конкурсот е отворен до 1 септември 2021 година, а како што посочуваат локалните власти и дел од стручната фела која го иницираше ова решение, има за цел да најде компромис меѓу приватниот и јавниот интерес и да воспостави нова пракса во урбанистичкото планирање.
Од Општина Центар во денешното соопштение до јавноста посочуваат дека програмската задача што е креирана од стручната Комисија ангажирана за изготвување на задачата, има цел да обезбеди комбинирани содржини, односно станбен и деловен фонд во рамнотежа со јавниот простор, како и нови содржини за изградба на нова детска градинка, придружни комерцијални и јавни содржини во функција на домувањето, содржини од областа на културата, зачувување на просторните маркери од локалитетот, зеленило со еколошка функција и одржливост во планирањето на сообраќајот.
Во споредба со актуелниот план, придобивките што се очекуваат од Конкурсот за изработка на идејно архитектонско-урбанистичко решение за локалитетот фабрика Треска се зголемување на површината за јавни функции до 47% (проценти), локација за нова детска градинка со капацитет за 250 деца, детски и спортски игралишта и зачувување на зелениот фонд, согласно новиот Правилник за урбанистичко планирање. Споредбено со важечкиот план, станбените и деловните згради ќе имаат поквалитетно просторно решение што на самите инвеститорите ќе им се овозможат нови поволности за добивање поквалитетни решенија за станбени заедници и паркинг-простор.
За потребите на конкурсот Општина Центар обезбеди ажурирана подлога, геодетска снимка на постоечките дрвја, односно 95 дрва се геореференцирани, нумерирани и фото-документирани. Дополнително е направена анализа на сопственоста на земјиштето и објектите, спроведени се нумерички анализи и анализи на планските документации, како и други достапни податоци што ќе им овозможат на учесниците да се фокусираат на аналитичкиот и креативниот аспект на решението.
Право на учество на конкурсот ќе имаат домашни и странски физички и правни лица, со услов едно лице да има валидно овластвување од областа на урбанистичкото планирање. Согласно големината на конкурсната задача, заинтересираните кандидати ќе може да аплицираат во периодот од 24 јуни до 1 септември 2021 година. По завршување на конкурсот и фазата на оценување на испратените трудови, најдобрите тројца кандидати ќе бидат наградени со паричен фонд, а трудовите ќе бидат изложени на архитектонска изложба за јавноста.
Целосната документација ќе биде достапна на Електронскиот систем за јавни набавки и на официјалната веб-страница на Општината, www.centar.gov.mk.
