Додека Google се подготвува да ги врати повеќето од своите вработени, компанијата се соочува со работна сила која е сè понезадоволна од клучните работи како што се платата и способноста да се остварат целите во кариерата.
Годишното интерно истражување на вработените во Google, наречено Googlegeist, покажува дека се повеќе вработени во компанијата не ја сметаат нивната плата правична или конкурентна на она што би го заработиле на слична позиција во друга компанија.
Извршниот директор на компанијата, Сундар Пичаи, ги информирал вработените преку е-пошта дека истражувањето е „еден од најважните начини“ на кои компанијата проценува колку луѓето сакаат да работат за неа.
Задржувањето и задоволството на вработените се поважни од кога било за Google и другите технолошки компании, бидејќи рекорден број луѓе во САД ја напуштаат работата во потрага по нови можности.
Google, исто така, ќе ги врати повеќето од своите вработени во канцеларијата најмалку три дена во неделата. По две години работа на далечина поради пандемијата, повторното отворање на канцелариите на Google е закажано за 4 април.
Само 46% од учесниците во истражувањето изјавиле дека нивната вкупна плата е конкурентна во споредба со слични позиции во други компании. Ова е за 12 поени помалку од лани. Нешто поголемо учество – 56%, велат дека платата им е „правична“, што е намалување за осум поени во однос на претходната година.
Пичаи сè уште ја ужива поддршката од 86% од учесниците во истражувањето. Сепак, одговорите на некои од поконкретните прашања за него не се толку ласкави. Во врска со неговата визија за тоа каква би можела да биде компанијата, 74% велат дека Пичаи ги инспирира, додека исто толку велат дека неговите „решенија и стратегии му овозможуваат на Google да се справува одлично“.
Вкупно 61% од вработените веруваат дека можат да ги постигнат своите цели во кариерата во компанијата.
Резултатите од истражувањето покажуваат дека вработените се задоволни од способноста на Google да прикажува резултати во врска со мисијата „да ги организира информациите низ светот и да ги направи достапни и корисни за сите“.
Мисијата на Google добива 90% поддршка, а вредностите на компанијата 85%.
извор: biznisinfo.mk
