Во организација на Слоу Фуд Македонија, поддржано од Слоу Фуд Интернационал и Министерството за земјоделство, шумарство и водостопанство, тиквешките семејни винарии Наумчеви, Ерос, Јаковлевски, Вински подрум Попови, Захарчев, Пешков, како и винаријата Шато Камник, ќе ги претстават своите вина на овој вински саем пред интернационалната публика составена од вински професионалци, дистрибутери на вино, сомелиери, вински критичари и писатели, угостители и готвачи и вински ентузијасти.
За време на Slow Wine Fair поточно на 28 март во 10:30 часот, во Slow Wine арената на Bologna Fiere ( Болоњскиот саем) ќе се одржи и преставување на македонскиот како и Slow Wine водичите на Италија, САД, Кина, а колегите од Германија ќе го претстават нивното искуство за германското сертифицирање. Саемот ќе биде домаќин на првиот состанок на Slow Wine Coalition, инклузивна, колаборативна и меѓународна мрежа која ги обединува протагонистите од винскиот свет: винарите, ентузијастите и професионалците од секторот што е можност за дебата меѓу сите актери во мрежата, по примерот на Тера Мадре.
Во текот на трите дена на Slow Wine Fair ќе има и низа на конференции, мастер предавања и дегустации достапни за сите љубители на доброто, чисто и правично вино, но не само на виното. Ентузијастите и професионалците од секторот можат да уживаат во богатата програма на мастеркласови и да изберат меѓу илјадниците етикети од целиот свет, селектирани од Слоу Фуд. Овој последен дел ќе биде збогатен со учество на Федербио, Италијанската федерација за органско и биодинамично земјоделство.
Настанот ќе биде отворен за сите во недела на 27 март, додека 28 и 29 март, понеделникот и вторникот се резервирани за професионалците од секторот. Сепак, членовите на пошироката јавност кои имаат билети за мастеркласовите во понеделник или вторник сè уште ќе можат да пристапат на саемот.
извор: nezavisen.mk
