Во половина од светското земјоделско производство доминираат само четири главни култури: шеќерна трска, пченица, пченка и ориз. Сите тие ги извезуваат само неколку земји, а само четири мултинационални компании тргуваат со овие култури.
Познати како „ABCD food“ поради нивните иницијали, овие четири компании – Archer Daniels Midland (ADM), Bunge, Cargill и Louis Dreyfus – остварија огромни профити по скокот на цените на житариците поради руската инвазија на Украина, пишува Politico и пренесува tportal.
Cargill
Cargill е најголемата американска приватна компанија со седиште во Минесота, САД. Компанијата е основана во 1865 година. Основана е од трговци со жито чии потомци сè уште имаат мнозинска сопственост. Најголем дел од деловните операции го вршат во Швајцарија, а се лидери во трговијата, преработката и транспортот на најважните земјоделски производи, ѓубрива и месо. Покрај тоа, тие функционираат како еден од најголемите светски инвестициски фондови, со годишни приходи од околу 114 милијарди долари. Тие вработуваат повеќе од 166.000 луѓе во повеќе од 66 држави и претставуваат 25 отсто од извозот на жито во САД.
Компанијата произведува околу половина од сите пилешки производи на Мекдоналдс низ Европа и е најголемиот снабдувач на глобалните лидери во храната, како што се Нестле и Унилевер.
Louis Dreyfus
Louis Dreyfus, основана во 1851 година, е исто така приватна семејна компанија со седиште во Ротердам. Од самиот почеток, тие се фокусираа на трговијата со жито, шеќер и енергија ширум светот. Имаат филијали во повеќе од 100 земји, со 72 канцеларии.
Louis Dreyfus вработува повеќе од 22.000 луѓе ширум светот, со приходи проценети на 120 милијарди долари. Компанијата сочинува околу десет проценти од светската трговија со земјоделски производи и е најголемиот светски трговец со памук и ориз. Многумина го сметаат и за втор по големина играч на светскиот пазар на шеќер.
Bunge Limited
Со седиште во Сент Луис, Мисури, Bunge Limited започна со работа кон крајот на 19 век како трговец со жито во Јужна Америка, а денес е водечки светски производител на маслодајни семиња и клучен играч на глобалниот пазар на ѓубрива и најголем продавач на (флаширано ) растително масло. Приходите на компанијата се проценуваат на повеќе од 45 милијарди долари годишно. Според податоците од 2017 година, тие имале повеќе од 32.000 вработени во 40 земји.
Archer Daniels Midland
Четвртиот член на квартетот е ADM, Archer Daniels Midland, основан во американскиот даночен рај Делавер, со седиште во Илиноис, а неговото седиште е во Чикаго. Минатата година компанијата заработи 85 милијарди долари и вработува повеќе од 38.000 луѓе.
