Ако вашите примања не се доволно високи со одвојувања од 2-3 плати или со една месечна плата да си дозволите годишен одмор каков што посакувате, тогаш треба да почнете да штедите со време.
Годишниот одмор ни е потребен на сите, а каде и како ќе го поминеме најчесто зависи од нашите можности. Тоа е време кога треба да заборавите на секојдневните грижи, да ги опуштите телото и умот и да се наполните со енергија.
Ако вашите финансиски можности ве ограничуваат, за да имате одмор за кој нема да имате грижа на совест или долгови, треба да почнете да мислите со време и да заштедите пари.
Со овие три совети ќе успеете да ја остварите таа цел и догодина да отидете на вашиот одмор од соништата.
Планирајте до најмал детаљ
Трошоците на одмор брзо растат, но ако точно пресметате колку пари ќе ви требаат, ќе знаете колку точно да заштедите. Затоа треба да направите точен план во кој прва точка е да изберете каде сакате да одмарате и колку време. Потоа пресметајте ги трошоците.
Ова се неколку прашања што треба да си ги поставите: Која е целта на вашето патување? Дали на патувањето ќе посетите роднини, сакате да видите знаменитости или да правите нешто друго? Ќе патувате сами, во пар со друштво или со семејството? Во кое годишно време ќе патувате? Дали климата на местото каде што ќе патувате се разликува од климата каде што живеете? Како планирате да патувате – со авион, воз, сопствен автомобил...? Каде и како ќе бидете сместени – кај роднини, во хотел, хостел, Airbnb? Како ќе го платите сместувањето: со картичка, во кеш, на рати?
Ваквото детално планирање ќе ви помогне да заштедите на трошоци така што ќе купите карти по пониска цена ако ги резервирате порано, а истото важи и за сместувањето. Колку порано почнете со планирање, толку повеќе ќе заштедите.
Намалување на трошоците до одмор
Овој начин на штедење треба да го применувате без разлика која е целта, но годишниот одмор е прилично голема мотивација за да се откажете од некои работи што не се голем луксуз, а го олеснуваат вашиот паричник. Секојдневно може да намалите дел од трошоците за превоз (наместо со автомобил одете на работа со јавен превоз или со велосипед), за храна на работа (носете храна подготвена од дома наместо да купувате брза храна на работа) и паметно планирајте ја храната за да не фрлате храна што не сте ја искористиле навреме.
Одвојувајте пари секој месец
Колкава сума ќе одвојувате од месечната плата зависи од вашите трошоци, но мислете на тоа дека колку и да тргнете на страна ќе биде повеќе од ништо. А кога еднаш ќе ги тргнете парите и ќе ги насочите кон една голема цел – одмор од соништата – следниот месец ќе биде полесно. Најдобро е да ги штедите тие пари во девизи или на посебна сметка на која може да ви тече и камата.
.jpg)
