Следните два дена Македонија ќе биде во портокалова фаза и ќе имаме многу топло време
Владата ја одржа 70-та седница и препорачува поради топлотниот бран да се ослободат од работните обврски бремените жени и лицата на возраст над 60 години.
Понатаму, децата во градинките да немаат физички активности од 11:00 до 17:00 часот, приватниот сектор да го организира работното време со цел заштита од директна сончева изложеност на работниците и избегнување престој на отворено од 11:00 до 17:00 часот.
Единиците на локалната самоуправа, Црвениот крст и Центрите за социјални работи во регионите зафатени со топлотниот бран возраст, да пружаат помош на осамени, стари, изнемоштени лица и бездомници.
Со оглед на фактот дека одредени ризични производни и технолошки процеси може да претставуваат дополнителен ризик по здравјето на изложените работници, се потсетуваат работодавците на обврската за почитување на законските прописи од оваа област.
Согласно овие препораки, Владата донесе заклучоци:
- Државните органи и јавните претпријатија и установи да ги почитуваат препораките,
- Се препорачува на приватниот сектор да го организира работното време со цел заштита од директна сончева изложеност на работниците и избегнување престој на отворено во периодот од 11:00 до 17:00 часот,
- Оваа мерка да биде со времетраење од два дена, до натамошно одлучување,
- Работното време во градинките да се организира во периодот од 7:00 до 17:00 часот, при што да не се практикуваат физички активности и да не се изнесуваат децата на отворено по 11:00 часот.
- Сите правни субјекти кои вршат активности на отворено да ги запрат активностите во периодот од 11:00 до 17:00 часот. Ова особено се однесува на градежните работници.
Следните два дена Македонија ќе биде во портокалова фаза и ќе имаме многу топло време.
