На светските берзи минатата недела доларот ослабе во однос на кошницата валути, по три недели раст, при што еврото се врати над нивото од еден долар, откако Европската централна банка агресивно ги зголеми каматните стапки.
Индексот на доларот, кој го покажува движењето на вредноста на САД во однос на другите шест најважни светски валути, минатата недела падна за 0,5 отсто, на 108,96 поени, пишува Си Биз.
Истовремено, доларот ослабе за 0,8 отсто во однос на европската валута, па цената на еврото достигна 1,0045 долари.
Но, доларот порасна во однос на јапонската валута за 1,7 отсто на 142,50 јени, што е блиску до највисокото ниво во последните 24 години.
На почетокот на неделата индексот на доларот достигна ново највисоко ниво во последните 20 години, повеќе од 110 поени, бидејќи челниците на американската централна банка воопшто не се откажуваат во својата остра реторика за потиснување на инфлацијата.
Претседателот на ФЕД, Џером Пауел, минатата недела повтори дека ФЕД е „силно посветен“ на ограничување на инфлацијата и дека ќе продолжи да ја заострува монетарната политика додека не ја постигне таа цел.
Чарлс Јунс, претседател на филијалата на ФЕД во Чикаго, го поддржа Пауел велејќи дека ограничувањето на инфлацијата е приоритет.
Значи, сосема е јасно дека ФЕД ќе продолжи агресивно да ги зголемува каматните стапки за да ја ограничи инфлацијата, која се движи околу највисоките нивоа во повеќе од 40 години. ФЕД ги зголемува каматните стапки од март, а дополнително ќе ги зголеми на дводневниот состанок на 20 и 21 септември. Се очекува ново, трето по ред, зголемување од 0,75 процентни поени, во опсег од 3 до 3,25 отсто.
Се проценува и дека до крајот на годината каматните стапки би можеле да изнесуваат 3,7 отсто, а до март следната година и 4 отсто.
Од друга страна, јапонската централна банка извесно време ќе продолжи да води приспособлива монетарна политика поради слабоста на економијата, што е овозможено со релативно ниската инфлација.
Поради ова, курсот на доларот во еден момент се искачи над 144 јени, првпат по 24 години.
Но, откако јапонските власти се заканија дека ќе интервенираат на девизниот пазар, курсот на доларот се лизна под нивото од 143 јени на крајот на неделата.
Еврото зајакна по зголемувањето на каматните стапки на ЕЦБ
Еврото, пак, зајакна, а неговиот курс се врати над нивото од еден долар, откако Европската централна банка (ЕЦБ) ги зголеми каматните стапки за агресивни 0,75 процентни поени.
Откако ги зголеми каматните стапки во јули за половина процентен поен, ЕЦБ во четвртокот ја зголеми каматната стапка на банкарските депозити преку ноќ од нула на 0,75 отсто.
Каматната стапка за рефинансирање на банките е зголемена од 0,5 на 1,25 отсто, што е највисоко ниво од 2011 година, а каматната стапка за банкарските кредити преку ноќ од 0,75 на 1,5 отсто.
И бидејќи инфлацијата во еврозоната е на рекордно ниво, над 9 отсто, ЕЦБ најави натамошно зголемување на каматните стапки, иако на блокот му се заканува рецесија поради енергетската криза.
„На следните неколку состаноци, Управниот совет очекува дополнително зголемување на каматните стапки со цел да се намали побарувачката и да се заштити од ризикот од трајно зголемување на инфлаторните очекувања“, се вели во соопштението на ЕЦБ.
