Холандскиот производител на медицинска опрема Филипс соопшти дека очекува да укине околу 4.000 работни места во обид да ги рационализира трошоците по падот на пазарната вредност од 70 отсто минатата година.
Тоа значи дека ќе намали околу 5 отсто од својата работна сила, откако компанијата забележа нето загуба во третиот квартал, поврзана со повлекувањето на неговите неисправни респиратори за спиење и бидејќи континуираните проблеми со синџирот на снабдување ја намалија продажбата.
„Филипс“, кој вработуваше 78.189 луѓе на крајот на минатата година, ги нарече отпуштањата „итни“, но соопшти дека ќе треба да се консултира со синдикатите и социјалните партнери.
Најголем дел од отпуштањата ќе се случат во САД, Холандија, Индија и Кина, се вели во соопштението на компанијата во понеделникот. „Филипс“ планира да ја намали својата работна сила во Холандија за 800 луѓе, отпуштајќи 400 вработени и елиминирајќи уште 400 позиции преку отпуштање и намалена употреба на привремени работници. Ниту еден бизнис нема да биде продаден, но компанијата соопшти дека може да затвори некои единици кои генерираат продажба под 20 милиони евра.
Отпуштањата ќе го чинат „Филипс“ 300 милиони евра во наредните квартали и потоа ќе го заштедат истиот износ годишно.
Непосредните кратења на работните места во четвртиот по големина производител на медицински помагала според приходите се почеток на тековниот преглед наменет за „поедноставување на начинот на работа и отстранување на организациската комплексност“, велат од компанијата.
Тоа е првиот потег на новоименуваниот извршен директор Рој Џејкобс, кој ја презеде функцијата претходно овој месец бидејќи компанијата продолжува да се бори со последиците од повлекувањето на вентилаторите.
„Филипс“ ги шокираше инвеститорите минатата година со повлекувањето на 5,5 милиони вентилатори користени за лекување на апнеја при спиење поради стравувањата дека пената што се користи во уредите може да стане токсична.
„Мојот непосреден приоритет е да ја подобрам ефективноста за да можеме да почнеме да ја обновуваме довербата на пациентите, потрошувачите и клиентите“, рече Јакобс во изјавата.
„Ова ја вклучува тешката, но неопходна одлука веднаш да ја намалиме нашата работна сила за приближно 4.000 работни места“, додава Јакобс.
