Откако отпушти две третини од работната сила, првиот човек на Twitter, Илон Маск, ги собра преостанатите вработени во компанијата во седиштето во Сан Франциско и им кажа дека отпуштањата се завршени, но тоа наводно не е точно.
Минатата недела беа отпуштени десетици вработени во Twitter во одделенијата за продажба и инженерство, вклучително и едно кое директно му рапортира на Маск. Оваа информација ја открија извори од компанијата, но ја потврдуваат и објавите на отпуштените вработени на социјалните мрежи.
Тоа значи дека Маск направи најмалку три круга отпуштања од неговото ноемвриско ветување дека ќе престане да дели откази. Во меѓувреме, тој издаде директива за промена на начинот на кој рекламите се таргетирани на главниот feed на Twitter за само седум дена, како дел од неговиот план да го поправи она што тој лично го нарече „најлошата релевантност на рекламите во светот“.
Можеби ќе ве интересира: Реорганизација на работењето: Мета најавува отпуштање на илјадници работници
Маск сака да го промени таргетирањето на рекламите за да функционира како рекламите на Google, кои првенствено ги таргетираат клучните зборови за пребарување, а не активноста на корисникот и податоците за профилот. Тоа е пристап кој добро функционира за пребарувачите, каде што луѓето изразуваат специфична намера да најдат нешто, и тоа е она што му помогна на Google да изгради еден од најпрофитабилните бизниси на сите времиња. Сепак, ова досега не функционираше за бизнисот на социјалните мрежи.
Марцин Кадлучка, менаџер за инженерство за монетизација, кој директно одговарал пред Маск пред да биде отпуштен, во твит навести за неизводливоста на рокот од седум дена. Тој рече дека работата за подобрување на реклама може да се заврши за два до три месеци.
Маск даде сличен рок за промени поврзани со добивањето на официјална ознака за Twitter Blue откако ја купи компанијата, но рокот не беше испочитуван. Тој, исто така, може да го промени своето мислење за тоа како треба да функционираат рекламите на Twitter. Подобрувањето на рекламите е главниот фокус на Маск бидејќи тој верува дека тие се помалку персонализирани и ефективни од конкуренцијата. Сепак, сè уште не е јасно дали промената на таргетирањето ќе биде водена од клучни зборови како што е случајот со рекламите на Google и дали ќе го подобри квалитетот на рекламирањето на Twitter.
Еден поранешен вработен во Twitter, кој бил задолжен за рекламирање, рече дека Маск „нема поим за што зборува“.
