Оние што сонувале да живеат на брод, сега имаат можност да го исполнат тој сон, барем три години и под услов да се подготвени да платат 30.000 долари за секоја година.
Компанијата Life at Sea Cruises прифаќа резервации за тригодишно крстарење за време на кое патниците ќе поминат речиси 210.000 километри со крузерот MV Gemini, кој ќе исплови од Истанбул на 1 ноември годинава.
За време на крстарењето патниците ќе посетат 375 пристаништа низ светот, односно 135 земји и сите 7 континенти и ќе имаат можност да видат бројни знаменитости меѓу кои статуата на Христос Спасителот во Рио де Жанеиро, Таџ Махал во Индија, пирамидите во Гиза, Мачу Пикчу, Кинескиот ѕид и многу повеќе. Дел од крстарењето вклучува патувања до 103 тропски острови.
Од 375 пристигнувања во пристаништа, 208 ќе бидат ноќни, така што ќе има многу време за истражување и уживање.
Крузерот MV Gemini има 400 кабини и доволно простор за 1.074 патници, кои на располагање ќе имаат ресторани, работни и сали за состаноци, канцеларии, деловна библиотека, болница и бројни забавно-рекреативни содржини вклучувајќи базени, велнес центар и слично.
Услов за патувањето е патниците да потпишат тригодишно крстарење, но дозволено е два пара да изнајмат една кабина и да го споделат патувањето.
Божикните празници ќе се поминат во Бразил, а новогодишните во Аргентина. Крузерот ќе направи круг околу Јужна Америка, ќе ги посети Карибите, како и двата брега на Централна Америка. Исто така, предвидена е посета на западниот брег на Северна Америка, како и на Хаваите.
Патниците ќе имаат можност да ги посетат Јапонија, Јужна Кореја и Кина, Бали, Виетнам, брегот на Камбоџа, Сингапур и Куала Лумпур.
Планот за крстарење ги вклучува и Австралија, Нов Зеланд, Индија, Шри Ланка, Малдиви, Сејшели, Занзибар, Кејп Таун, Канарските Острови, Сввета Елена и Мадејра.
Медитеранот е исто така дел од патувањето, како и Северна Европа.
