Најдобрата шкотска ултрамаратонка е дисквалификувана поради користење автомобил за време на дел од трката.
Јосија Закржевски (47) заврши на третото место на 80 километри Ултрас маратонот Манчестер – Ливерпул 2023 година, но се верува дека патувала нешто повеќе од четири километри со автомобил.
Според податоците од GPS картата, 47-годишната ултрамаратонка од Дамфрис поминала километар и половина за една минута и 40 секунди.
Вејн Дринквотер, директор на трката на GB Ultras, рече дека бил информиран по ултрамаратонот дека тркачката стекнала „неспортска конкурентска предност за време на дел од настанот“.
„Прашањето е истражено и по проверка на податоците од нашиот систем за следење на трката, податоците од GPS, изјавите на нашите членови на тимот, другите натпреварувачи и самата учесничка, можеме да потврдиме дека тркачката сега е дисквалификувана поради користење возило за време на дел од патеката” рече тој.
Дринквотер додаде дека е поднесен извештај за дисквалификација до органите кои ја даваат лиценцата за настанот.
Третото место на трката, која се одржа на 7 април, сега е доделено на Мел Сајкс.
Во февруари, на ултрамаратон во Тајван, Закржевски победи на 48-часовната трка поставувајќи светски рекорд од 255 милји (411,5 километри).
Тркајќи за Велика Британија на Светското првенство на 100 километри, таа освои индивидуално сребро во 2011 година и бронза во 2014 и 2015 година.
Таа исто така ја претставуваше екипата на Шкотска на маратонот на Игрите на Комонвелтот во Глазгов во 2014 година.
