Мистеријата на Титаник сè уште не е решена иако од оваа трагедија поминало повеќе од еден век. Сè уште не е откриено што се случило во трагичната ноќ во 1912 година кога потонал бродот со над 1500 патници. На Титаник биле најбогатите тогашни луѓе на светот, но и стотици мигранти, како и сите оние кои сакале да отпловат до „ветената земја“.
Дигитално скенираниот модел на Титаник е создаден со мапирање на длабокото море и претставува уникатен 3Д поглед на целиот брод, во кој изгледа како Атлантскиот Океан да е пресушен. „Сè уште има прашања, фундаментални прашања за бродот кои треба да се одговорат“, изјавил аналитичарот Парк Стивенсон за Би-Би-Си. Се скенираат и најмалите детали. Тој изјавил дека овој модел е „еден од првите големи чекори кон истражување засновано на докази, а не кон шпекулации“.
Иако остатоците од Титаник биле пронајдени далечната 1985 година, тој бил толку огромен што камерите во темните длабочини покажувале само слики од делови од бродот што се распаѓа, а не од целиот брод. Благодарение на новата снимка, во целост ќе биде прикажан целиот брод, а нè очекува и документарен филм од Atlantic Productions. За време на истражувањето, подморниците поминале повеќе од 200 часа под вода и направиле повеќе од 700.000 фотографии како би се создала точна 3Д реконструкција.
Водачот на експедицијата Герхард Зајферт изјавил дека Magellan го завршил најголемиот проект за скенирање под вода досега. „Длабочината од речиси 4.000 метри каде што се наоѓа бродот е голем предизвик поради струите, а не смеевме да допреме ништо за да не го оштетиме потонатиот брод. Исто така, предизвикот е што секој квадратен сантиметар мора да биде мапиран, дури и неинтересни делови како калта во полето од остатоци, но тоа е исто така неопходно за целокупната слика“, рече тој. Една од интересните работи е што никој сè уште не ја разбрал природата на судирот со сантата мраз, не е ни познато дали бродот бил погоден од десната страна, како што гледавме во култниот филм. Анализата на крмата може да открие детали за тоа како бродот удрил во морското дно.
Морето има ефект врз потонатиот брод бидејќи микробите го јадат, предизвикувајќи делови да се распаѓаат. Историчарите се свесни дека истекува времето за целосно разбирање на морската катастрофа, но скенирањата навреме ги „замрзнаа“ остатоците од бродот и ќе им послужат на експертите да го анализираат секој детал со надеж дека Титаник може да открие уште некоја од неговите тајни.
