Мајкрософт во понеделникот потврди дека ги елиминира дополнителните работни места, една недела по почетокот на својата фискална 2023/24 година.
Кратењата на работните места се во прилог на отпуштањата објавени во јануари кои резултираа со 10.000 отпуштања.
Амазон, Гугл и други големи технолошки компании, исто така, ги намалија работните места претходно оваа година, откако го зголемија персоналот во претходните години за да ја задоволат зголемената побарувачка за време на пандемијата „Ковид-19“. Мајкрософт изјави во последните месеци дека клиентите бараат начини да заштедат пари на сметките за облак услуги.
Портпаролот на Мајкрософт одби да го прецизира бројот на намалувања во последниот круг. Во јануари, извршниот директор Сатја Надела објави меморандум во кој истакна дека компанијата ќе ја промени својата хардверска линија и ќе ги консолидира договорите за закуп, што може да навести за намалување на бизнисот.
Во понеделникот Мајкрософт објави дека ќе отпушти 276 луѓе само во својата родна држава Вашингтон. Од нив, 66 се виртуелни работни места.
Продавачите на Мајкрософт и надворешните претставници во понеделникот на социјалните мрежи објавија дека останале без работа.
„Организацијата и прилагодувањата на работната сила се неопходен и редовен дел од управувањето со нашиот бизнис“, рече портпаролот во е-пошта.
„Ќе продолжиме да даваме приоритети и да инвестираме во области на стратешки раст за нашата иднина и во поддршка на нашите клиенти и партнери“, додаде тој.
