Во април 1933 година, менаџерката на хотелот Алди Мекеј рече дека видела суштество слично на кит во езерото.
Потрагата по чудовиштето од Лох Нес во Шкотска, кое се смета за најголем лов на Неси во последните повеќе од 50 години, продолжува во шкотските висорамнини овој викенд со вклучување на стотици волонтери.
Стотина волонтери се пријавија да ги снимат природните – и сите невообичаени – сцени на Лох Нес од гледни точки на копно. Речиси 300 од нив се пријавиле за да ја следат потрагата во живо, која се одвива во сабота и недела. Приказните за чудовиштето постојат со векови, но поминаа 90 години од почетокот на модерниот мит за Неси.
Во април 1933 година, менаџерката на хотелот Алди Мекеј рече дека видела суштество слично на кит во езерото. Тоа беше објавено од локалниот весник „Инвернес курир“, а потоа уредникот Еван Барон предложил суштеството да се нарече „чудовиште“. Хотелот сега е дом на центарот Лох Нес, кој обезбедува информации и организира обиколки на езерото. Оттогаш, мистеријата на Неси ги инспирираше книгите, ТВ емисиите и филмовите, како и одржувањето на профитабилната туристичка индустрија.
Пребарувањето викендов беше организирано од Центарот Лох Нес во Драмнадрочит и волонтерски истражувачки тим наречен „Истражување на Лох Нес“. Над езерото, дронови со инфрацрвени камери произведуваат термални снимки, а под површината на езерото, хидрофон, еден вид подводен микрофон, снима звучни сигнали. Организаторите рекоа дека тоа е најголемата потрага по чудовиштето откако Истражувачката канцеларија во Лох Нес во 1972 година спроведе студија која не успеа да го пронајде чудовиштето.
Во 2019 година, научниците рекоа дека суштествата за кои се смета дека се легендарното чудовиште од Лох Нес можеби се џиновски јагули. Истражувачите од Нов Зеланд се обидоа да ги каталогизираат сите живи видови во езерото со екстракција на ДНК од примероци од вода. По анализата, научниците го отфрлија присуството на големи животни за кои се тврдеше дека се чудовишта. Не се пронајдени докази за праисториски морски рептил наречен плезиосаур или голема риба како есетра.
